Жыхар Рэчыцы Дзяніс Сцепаненка яшчэ нядаўна балатаваўся ў дэпутаты мясцовых саветаў пры падтрымцы «Гавары Праўду». А цяпер ён піша заявы ў міліцыю, каб незалежныя суполкі ў сацыяльных сетках пакаралі як мага хутчэй.
Першым увагу на гэта звярнуў блогер Эдуард Пальчыс. Ён паведаміў, што Сцепаненка звярнуўся ў міліцыю, каб праверылі суполку Укантакце «Рэчыца без цэнзуры». Па словах блогера, абурэнне Сцепаненкі выклікаў пост, які пераказваў артыкул Пальчыса, у якім праводзяцца аналогіі з Украінай і выказваюцца думкі, што мусіць адбывацца ў грамадстве, каб «зрынуць злачынны рэжым».
А калі міліцыя ніякага злачынства ў дзейнасці суполкі не знайшла, то Сцепаненка пайшоў у КДБ і пракуратуру. Там ён ужо напісаў заявы на міліцыянтаў.
Сам Сцепаненка гаварыць на гэтую тэму не захацеў.
«Я каментаваць нічога не буду пакуль, можа, пазней», — адказаў ён «Нашай Ніве».
Аднак ускосна пацвердзіў, што паскардзіўся на міліцыянтаў ў іншыя структуры. Пакуль што праводзяцца праверкі.
Па словах Сцепаненкі, адна з прычын, чаму ён пайшоў міліцыю, — абразы, якія з’яўляюцца ў суполцы «Рэчыца без цэнзуры».
«У дачыненні да мяне там пастаянна хлусня, паклёп, абразы, распаўсюджваецца непраўдзівая інфармацыя, якая ганьбіць мяне. І гэта стала прычынай напісання заявы», — патлумачыў ён.
Дарэчы, пошук па запісах суполкі паказвае, што Сцепаненку там, мякка кажучы, не вельмі любяць.
А што з допісам, у якім пераказваўся артыкул Пальчыса? Пасля яго актывіст сапраўды пайшоў у міліцыю?
Сцепаненка прызнае, што заяву напісаў, бо нешта ў тым допісе яго абурыла. А што канкрэтна — не памятае.
«Я не памятаю, што я пісаў. Я напісаў і забыўся, хай правяраюць, што хочуць, тое і робяць», - адказаў ён.
Праўда, «Гавары Праўду» ужо адхрысцілася ад Сцепаненкі. Андрэй Дзмітрыеў паведаміў, што ў арганізацыі фіксаванае членства — кандыдаты пішуць заявы, і іх асобы разглядаюцца. Сцепаненка членам «Гавары праўду» ніколі не быў, запэўніў Дзмітрыеў, маўляў, проста дапамагаў арганізацыі.
«Што тычыцца выбараў у мясцовыя саветы. Ён ішоў пры падтрымцы «Гавары праўду». Гэта было палітычнае рашэнне — мы ставілі перад сабой задачу ўцягнуць у палітычную працу як мага больш грамадзян, якія падзяляюць стратэгію мірных пераменаў. Частка з тых, хто ішоў на выбары пры нашай падтрымцы, не былі сябрамі ГП і не сталі імі пасля. Мы разумелі рызыкі, з якімі звязана такое рашэнне. І пайшлі на іх свядома», — напісаў Дзмітрыеў у фэйсбуку.
Каментары