Арганізатар фестывалю FSP і кіраўнік рэкламнага агенцтва Pocket Rocket Дзяніс Чырка распавёў на сваёй старонцы ў Facebook, што «галоўны пікнік лета» зараз становіцца біенале і ў наступны раз пройдзе ў 2020 годзе, піша Tut.by.
— FSP — грандыёзны ўнутраны прадукт маленькага агенцтва Pocket Rocket, — піша Дзяніс. — Былі гады, калі фестываль спансаваў агенцтва і наадварот. FSP стаў рэалізацыяй нашых амбіцый — першапачаткова ніхто не разумеў, як робіцца фестываль, збіраецца каманда, з'яўляюцца спонсары, браніруюцца музыканты, робіцца рэкламная кампанія і інш. У 2018 колькасць спонсараў, фудкортаў, вендараў і прыгожых гасцей і інстаграмак перавысіла гістарычны максімум. Усё атрымалася і дакладна атрымаецца ў наступным годзе. Ёсць адно «але». Pocket Rocket — гэтая платформа пуску новых нестандартных праектаў, а не касмічная арбітальная станцыя. Нам жыццёва неабходна пераадольваць прыцягненне, а не падтрымліваць вялікія ўжо сфарміраваныя праекты.
Карацей, мы намацалі новыя кірункі развіцця агенцтва, паставілі цяжкія для рэалізацыі мэты і імкнёмся да іх. Пачнём з некалькіх вірусных ролікаў, глабальных дызайн-сістэм. Сачыце за намі, абяцаем пару бомбаў у пачатку студзеня 2019.
Па словах арганізатараў, пікнік пройдзе 25 і 26 ліпеня 2020 года, і гэта будзе ўжо іншы фестываль зусім новага ўзроўню.
Каментары