Крыніцы The Telegraph ў брытанскім урадзе мяркуюць, што інтэрв'ю Пятрова і Башырава было «пакараннем» за няўдачу. Раней «атручвальнікі» распавялі, што прыехалі ў Солсберы паглядзець на знакаміты сабор
Па словах крыніц, іншыя ведамствы расійскіх спецслужбаў абвінавачваюць Галоўнае выведвальнае упраўленне (ГРУ, зараз Галоўнае ўпраўленне Генштаба РФ) у тым, што яго супрацоўнікі «зайшлі занадта далёка» з наступствамі «спробы атручвання» былога афіцэра ГРУ Сяргея Скрыпаля і яго дачкі.
Брытанскія чыноўнікі, якіх цытуе газета, лічаць, што двое падазраваных Скотланд-ярдам у замаху на Скрыпаля - Руслан Башыраў і Аляксандр Пятроў - былі вымушаныя даць інтэрв'ю ў якасці пакарання за «пакінутыя сляды падчас аперацыі». Гаворка ідзе пра тое, што яны патрапілі на камеры назірання, выкарыстоўвалі грамадскі транспарт, і пакінулі флакон з-пад «Навічка».
У пачатку верасня Скотланд-Ярд назваў Башырава і Пятрова падазраванымі ў замаху на Сяргея Скрыпаля і яго дачку Юлію. Брытанская паліцыя паказала фатаграфіі іх перасоўванняў па Солсберы, а таксама флакон з-пад парфумы Nina Ricci, у якім перавозіўся «Навічок». Прэм'ер-міністр Брытаніі Тэрэза Мэй назвала Башырава і Пятрова супрацоўнікамі ГРУ.
12 верасня Уладзімір Пуцін звярнуўся да «атручвальнікаў» Скрыпалёў. Ён сказаў, што Крэмль знайшоў іх і прапанаваў Башыраву і Пятрову самім з'явіцца ў СМІ. «Нічога там асаблівага і крымінальнага няма», - сказаў Пуцін.
На наступны дзень Башыраў і Пятроў далі інтэрв'ю галоўнаму рэдактару RT. Яны сказалі, што на фотаздымках, прадстаўленых Лонданам, сапраўды яны. Па словах Башырава і Пятрова, у Солсберы яны прыехалі паглядзець на знакаміты сабор. Башыраў і Пятроў адмаўлялі, што яны мелі пры сабе флакон з атрутным рэчывам, роўна як і сцвярджэнні, што яны працуюць на ГРУ. Яны сказалі, што з'яўляюцца бізнесменамі «сярэдняй рукі», якія гандлююць спартовым харчаваннем. Тым часам кампаній, зарэгістраваных на Башырава і Пятрова, няма.
Пазней група расследвальнікаў Bellingcat апублікавала пашпартнае дасье Пятрова, на якім стаіць штамп «звестак не даваць» і код 195-76-66. На адваротным баку дакумента пазнака - «ёсць ліст С.С.». Такія ж словы ёсць на заяве Пятрова на замену пашпарта, якое апублікавала Бі-бі-сі. І ў Bellincat, і ў Бі-бі-сі лічаць, што «С.С», расшыфроўваецца як «цалкам сакрэтна», што кажа аб прыналежнасці да спецслужбаў. Журналістам, якія патэлефанавалі па нумары, пазначаным у заяве Пятрова, адказалі, што яны трапілі ў Мінабароны Расіі.
Каментары