Існуе меркаванне, што век нафты сыходзіць у нябыт. Ці значыць гэта, што аглушальны рык матацыклетных матораў таксама неўзабаве зробіцца гісторыяй? Не факт. Прынамсі, матацыклы здавацца не збіраюцца. Наадварот — электрычныя рухавікі даюць магчымасць эксперыментаваць з дызайнам. Вось некалькі цікавых экземпляраў.
Harley Davidson LiveWire (ЗША)
Так-так, легендарны амерыканскі мотавытворца не жадае застацца на ўзбочыне электрычнай рэвалюцыі. У жніўні Harley Davidson прэзентаваў уласны прататып электрабайка LiveWire. Кампанія характарызуе яго як «магутны, але лёгкі ў кіраванні». Як мяркуецца, электрычны «харлей» трапіць у продаж налета.
![](http://nashaniva.com/img/w732d4webp1/photos/z_2018_09/moto_harley-7rpiz.jpg.webp)
Дарэчы, самую першую версію свайго электрабайка Harley Davidson прэзентаваў публіцы ў 2014 г. Тая спроба, здаецца, была фальстартам — для масавага выпуску электраматацыклаў рынак быў яшчэ не гатовы. Тым не менш, як сцвярджае кампанія на сваім сайце, напрацоўкі чатырохгадовай даўніны будуць уключаныя ў новую мадэль.
![](http://nashaniva.com/img/w732d4webp1/photos/z_2018_09/moto_harley_black-t4r6c.jpg.webp)
Light Rider (Германія)
Біялагічны дызайн Light Rider — плён працы майстэрні APWorks, што на паўднёвым ускрайку Мюнхена. Баварскія майстры пазіцыянуюць яго як першы ў свеце прататып электрычнага матацыклу, надрукаваны на 3-D прынтары.
![](http://nashaniva.com/img/w732d4webp1/photos/z_2018_09/moto_lightrider_big-d7m32.jpg.webp)
Электрарухавік разганяе байк да 80 кіламетраў за гадзіну. Малавата? Ну але ж затое сам матацыкл важыць усяго толькі 35 кілаграмаў. Лёгкасцю матацыкл абавязаны найперш высокатэхналагічнай 6-кілаграмовай раме.
![](http://nashaniva.com/img/w732d4webp1/photos/z_2018_09/moto_lightrider_rama-7dd7m.jpg.webp)
Між іншым, структура рамы нагадвае косную тканку чалавека:
![](http://nashaniva.com/img/w732d4webp1/photos/z_2018_09/moto_lightrider_rama_2-32vd7.jpg.webp)
Energico Eva (Італія)
Каб вы не думалі, што большасць электрабайкаў — гэта насамрэч ціхаходныя скутары ў матацыклетнай скуры, вось вам матацыкл з няўрымслівым італьянскім характарам. Energico. Фабрыка з паўночнаітальянскай Мадэны, спецыялізуецца выключна на вырабе электраматацыклаў. Яе мадэль Eva можа праехаць да 200 кіламетраў на адной зарадцы (у энергазберагальным рэжыме), а таксама разганяецца да 200 кіламетраў за гадзіну. Energico рэкламуе мадэль пад хэштэгам «мой электрычны грэх» (італьянцы ёсць італьянцы!).
Фотаздымак з брашуры кампаніі (Eva справа):
![](http://nashaniva.com/img/w732d4webp1/photos/z_2018_09/moto_eva-rvdd9.jpg.webp)
Zero DS (ЗША)
![](http://nashaniva.com/img/w732d4webp1/photos/z_2018_09/zero-ds-studio-3_ae830964-ta1b7.jpg.webp)
Кампанія Zero нарадзілася ў гаражы ў мястэчку Санта Круз, пад яркім каліфарнійскім сонцам. На сёння гэта адзін з самых сур’ёзных вытворцаў серыйных электрабайкаў. Першыя электрабайкі Zero вырабіла яшчэ ў 2006 г. Нельга сказаць, што матацыкл уражвае арыгінальным дызайнам — у прынцыпе, ягоможна было б пераблытаць са звычайным байкам, калі б не ціхі электрычны рухавік.
Электрычнасць заліваць сюды…
![](http://nashaniva.com/img/w732d4webp1/photos/z_2018_09/moto_zero-5n1fl.jpg.webp)
Тыповая зарадка Zero DS займае каля гадзіны. Доўга? Каму як. Кампанія раіць скарыстаць час, пакуль ваш байк зараджаецца, схадзіць на ланч ды завесці прыемнае знаёмства:
![](http://nashaniva.com/img/w732d4webp1/photos/z_2018_09/moto_zero_lunch-1p8ac.jpg.webp)
BMW Vision Next 100 (Германія)
![](http://nashaniva.com/img/w732d4webp1/photos/z_2018_09/bmw_bike-d2d2m.jpg.webp)
Гэты звышсучасны матацыкл немагчыма набыць ці патэсціць — ён існуе толькі ў выглядзе віртуальнага канцэпту. Прыкладна так кампанія BMW уяўляе свой будучы электрабайк. І што з таго, што ён існуе пакуль што толькі ва ўяўленні дызайнераў? Калі рэальны байк будзе хоць у нечым падобны да гэтага, ён мае ўсе шанцы зрабіцца сапраўдным хітом. Даўжэй запрагаеш — шпарчэй едзеш:
Lito Sora (Канада)
![](http://nashaniva.com/img/w732d4webp1/photos/z_2018_09/lgm_sora-0751_final-gdm-lmtyu.jpg.webp)
Будаўнікі электрабайкаў з канадскага Квебеку стварылі сапраўды олд-таймер будучыні. Матацыкл нават мае паліўны бак — хоць насамрэч у ім знаходзіцца акумулятар, які дазваляе Lito Sora праехаць да 120 кіламетраў без зарадкі. Электрабайк здольны разагнацца да 120 кіламетраў за гадзіну.
![](http://nashaniva.com/img/w732d4webp1/photos/z_2018_09/sora-028-zf2fl.jpg.webp)
Johammer J1 (Аўстрыя)
У гэты электрабайк можна лёгка закахацца —
![](http://nashaniva.com/img/w732d4webp1/photos/z_2018_09/johammer_action_freilandstr_3-u745j.jpg.webp)
калі, канечне, вы не з тых саркастычных каментатараў, якія параўноўваюць J1 з лядоўняй на колах. Больш рамантычныя назіральнікі, заўважаюць падабенства дызайну корпуса электрабайка з экіпіроўкай каня на сярэднявечным рыцарскім турніры:
![](http://nashaniva.com/img/w732d4webp1/photos/z_2018_09/medieval-jousting-tournaments-bqh96.jpg.webp)
J1 — гэта не канцэпт, а сапраўдны матацыкл, які можна набыць. З перавагаў — даволі вялікі запас ходу. Адна зарадка дазваляе праехаць 200 кіламетраў.
Корпус электрабайка можна замовіць у пяці розных колерах, уключна з салатавым:
Каментары