Вынікі прэзідэнцкіх выбараў у Літве: розніца паміж кандыдатамі склала 0,18%
Будзе другі тур з закручанай інтрыгай.
12 мая ў Літве прайшоў першы тур прэзідэнцкіх выбараў і два рэферэндумы (аб скарачэнні колькасці дэпутатаў і пашырэнні падвойнага грамадзянства). Зараз ідзе падлік галасоў.
Пасля падліку галасоў на 1 972 участках перамагае кансерватар Інгрыда Шыманіце — 31,13%, эканаміст Гітанас Наўседа — 30,95%, прэм'ер Саўлюс Сквярняліс — 19,72%.
Прычым Шыманіце скараціла адставанне і ўпэўнена абагнала Сквярняліса, бо пасля вынікаў на першых участках прэм'ер перамагаў з вынікам ледзь не 5%.
Сацыял-дэмакрат Віцяніс-Повілас Андрукайціс набірае 4,79%, філосаф, адзін з заснавальнікаў «Саюдзіса» Арвідас Юозайціс — 4,69%, лідар Выбарчай акцыі палякаў Літвы Вальдэмарас Тамашэўскі — 4,00%, Mіндаўгас Пуйдокас — 2,58%, Нагліс Пуцейкіс — 0,79%, Валянцінас Мазуроніс — 0,65%.
Яўка на выбарах склала 56%
Вынікі крыху сенсацыйныя, бо папярэднія апытанні аддавалі першае месца Шыманіце. А Сквярняліс толькі нядаўна меў, паводле тых жа апытанняў, усяго 16%.
Гітанасу Наўседу — 55 гадоў, ён вядомы банкір і эканамічны дарадца. Быў дарадцам прэзідэнта Валдаса Адамкуса (2004—2009), галоўны эканаміст банка SEB. Наўседа — жанаты, у яго дзве дачкі.
Інгрыдзе Шыманіце — 45, яна была міністрам фінансаў у 2009—2013 гг., затым намеснікам старшыні Банка Літвы. Кандыдат ад Саюза Айчыны — хрысціянскіх дэмакратаў. Не замужам, дзяцей няма. Выйграла праймерыз у дыпламата Вігаўдаса Ушацкаса з вынікам 78%.
Саўлюсу Сквярнялісу — 48. З адукацыі ён інжынер-матэматык, але вырашыў зрабіць паліцэйскую кар'еру. Прайшоў усе прыступкі: ад дарожнага інспектара ў Тракаі да генеральнага камісара паліцыі і міністра ўнутраных спраў. Яго партыя «Саюз зялёных і сялян» у 2016 г. выйграла выбары, і Сквярняліс узначаліў урад. Саўлюс жанаты, у яго дачка і сын.
Сквярняліс паабяцаў, што калі не пройдзе ў другі тур, то падасць у адстаўку і з пасады прэм'ера.
Сквярняліс затым позна ўвечары прызнаў, што не прайшоў у другі тур.
Даля Грыбаўскайце адбыла два тэрміны, таму балатавацца не магла.
У Літвы будзе новы прэзідэнт. Сёння там выбары, і ёсць інтрыга, вартая добрага дэтэктыва
Другі тур — 26 мая, у гэты ж дзень пройдуць выбары ў Еўрапарламент.
Цяпер чытаюць
Што азначае з’яўленне выхадцаў з Беларусі ў расійскім спецпадраздзяленні для асабліва важных аперацый і тайных забойстваў?8
Каментары