Паводле новага генплану развіцця сталіцы ў межах кальцавой месца для прыватнага сектару амаль не будзе.
Паводле новага генплану развіцця сталіцы ў межах кальцавой месца для прыватнага сектару амаль не будзе.
Папярэдні генеральны план развіцця Мінску быў прыняты шэсць гадоў таму. За гэты час ён састарэў, і прыйшлося складаць новы. Праца яшчэ працягваецца. Праект чакае ўзгаднення з рознымі муніцыпальнымі структурамі і зацверджання экспертаў.
Навінак у ім хапае.
Распрацоўшчыкі хочуць павялічыць тэрыторыю Мінску больш чым у паўтара разу, вынесці з межаў гораду большасць заводаў…Усё пералічанае не павінна выклікаць ніякіх спрэчак, чаго не скажаш пра наступныя ідэі.
Па‑першае, гэта будаўніцтва трасы ў абыход Мінску, якая звяжа віленскі і кіеўскі кірункі. Жыццё вёсак, каля якіх пойдзе абхадная, зменіцца.
Другая праблема звязаная са зносам прыватнага сектару. Ранейшы (яшчэ дзейсны) генплан прадугледжваў частковае захаванне прыватных дамоў і нават будаўніцтва новых, цяпер ад такой ідэі вырашана адмовіцца. Мінску пагражае масавае перасяленне прыватнага сектару. Распрацоўшчыкі абяцаюць, што гэта не закране элітныя раёны з сучаснымі катэджамі. Сапраўды, было б дзіўна, каб на месцы Драздоў з рэзідэнцыяй Лукашэнкі быў запланаваны шматпавярховы дом для чарговых ільготнікаў. Неэлітным жыхарам можна рыхтавацца да найгоршага варыянту. Праўда, калі ўзгадаць, з якім вэрхалам руйнаваліся дамы ў раёне будаўніцтва метро, як людзі абаранялі свае кватэры на вуліцы Маркса, можна зразумець, што знос прыватнага сектару стане глабальнай праблемай для сталічных уладаў.
Блізкая да папярэдняй і ідэя будаўнітва трэцяга транспартнага кола. Праўда, колам праектаваную трасу можна назваць з вялікай нацяжкай. Траса, якая абапіраецца на ўжо пабудаваныя вуліцы Гарэцкага, Алібегава, Малініна, Радыяльную і шэраг іншых, усё роўна захопіць і прыватны сектар у Курасоўшчыне, Лошыцы, Зялёным Лузе. Але хто менавіта стане ахвярай новага будаўніцтва і калі жыхароў праінфармуюць пра новыя ідэі сталічных кіраўнікоў — пытанне застаецца адкрытым.
У праекце генплану не прапісана ніякай канкрэтыкі: ніхто не можа даць гарантыі, што ён не будзе зноў пераглядацца. Кіраўнік Мінгарвыканкаму Міхаіл Паўлаў нават рэкамендаваў уносіць дапаўненні і змяненні кожныя два гады. Цалкам мажліва, што іншы мэр ці іншыя праекціроўшчыкі пачнуць праводзіць супрацьлеглую палітыку і, напрыклад, заахвочваць будаўніцтва прыватных катэджаў.
Цяпер чытаюць
Мацкевіч: Ціханоўскую зняць, замяніць, пераабраць нельга. Не мучайцеся. Нельга — і ўсё28
Каментары