На сайце сына Бабарыкі грошы на штраф учарашняму пікетоўцу людзі сабралі за 10 хвілін
Усяго 10 хвілін заняў збор грошай на выплату штрафу жыхару Мінска Яўгену Гормашу на Molamola.by.
Веласіпедыста Гормаша схапілі і асудзілі за тое, што ён крычаў «Ганьба!» і «Сорам!» на адрас супрацоўнікаў ДАІ — апошнія спынялі машыны, што сігналілі ў знак салідарнасці з людзьмі, якія стаялі ў чэргах, каб аддаць подпіс за альтэрнатыўных кандыдатаў.
Гормаша спачатку адбілі людзі на вуліцы, але пасля міліцыянты ўсё ж злавілі яго ў двары і аддалі пад суд, які выпісаў яму 1350 рублёў штрафу (гэта нашмат больш за сярэднямесячны заробак беларуса).
Тады Гормаш змясціў просьбу дапамагчы яму з выплатай гэтага штрафу на сайце Molamola.by.
«Дзіўна тое, што складзеныя на мяне пратаколы зусім не апісваюць гэты інцыдэнт з ДАІ. У іх ні слова пра ДАІшнікаў і канфлікт з імі. Склалі тры пратаколы: дробнае хуліганства, непадпарадкаванне законнаму распараджэнню ці патрабаванню службовай асобы пры выкананні ім службовых паўнамоцтваў, парушэнне парадку арганізацыі або правядзення масавых мерапрыемстваў», — напісаў Гормаш.
Вынік перавысіў яго чаканні. Суму яму назбіралі за 10 хвілін, а на гэты момант яму ўжо накідалі 2350 рублёў. Большасць людзей ахвяравала па 5—10 рублёў, усяго ён атрымаў дапамогу ад 230 чалавек.
Цікава, што краўдфандынгавую платформу Molamola.by стварыў Эдуард Бабарыка — сын банкіра і мецэната Віктара Бабарыкі, які цяпер узначальвае ініцыятыўную групу па яго вылучэнні ў прэзідэнты.
Гормаш абяцае перадаць рэшту грошай на дапамогу іншым рэпрэсаваным актывістам «Краіны для жыцця».
Каментары