Міністр Каранік сказаў, што Гомельшчына выйшла на плато. Вось толькі лічбаў не назваў
Ілюстрацыйнае фота Надзеі Бужан
Гомельшчына выйшла на плато па захворванні на каранавірус. Пра гэта распавёў міністр аховы здароўя Беларусі Уладзімір Каранік падчас візіту ў абласны цэнтр, паведамляюць Гомельскія ведамасці.
— Зараз мы бачым, што ў цэлым сітуацыя па-ранейшаму застаецца кантраляванай. У многіх рэгіёнах назіраем заціханне эпідэміялагічнага працэсу, то-бок пік мы ўжо прайшлі. Адзначаем зніжэнне захворвання як на каранавірусную інфекцыю, так і на пнеўманіі, — растлумачыў міністр.
Гомельская вобласць, паводле слоў Караніка, цяпер выйшла на плато, і ў найбліжэйшыя тыдні тут чакаецца спад. Праўда, колькасць захварэлых у рэгіёне міністр так і не агучыў.
Больш як месяц у Беларусі не называюцца лічбы захварэлых па рэгіёнах. Асобныя звесткі даюць толькі раённыя ўлады.
Каментары