Германія б’е рэкорды па захворваннях за ўсю пандэмію. Кажуць, асноўная віна на антываксерах
Калісьці Германія была прыкладам у барацьбе з кавідам. Цяпер жа недавер да прышчэпак спрыяе таму, каб мясцовыя паказчыкі пандэміі ўзляцелі на новы ўзровень.
Чацвёртая хваля пандэміі кавіду аказалася для Германіі самай моцнай. Кожны дзень прыносіць дзясяткі тысяч новых хворых на кавід і новых смерцяў. Напрыклад, за 15 лістапада Германія пабачыла адпаведна 30483 новыя выпадкі кавіду, ад хваробы ў той жа дзень памерлі 167 чалавек.
Асноўным рухавіком цяперашняга і самага цяжкага этапа пандэміі ў краіне сталі антываксеры, піша New York Times.
Для Германіі гэта неверагодны паварот. Калі пандэмія толькі пачыналася, Германія паказала прыклад таго, як спраўляцца з вірусам і трымаць нізкім узровень смерцяў. Краіна хутка арганізавала паўсюднае тэсціраванне, пашырыла колькасць месцаў у рэанімацыях і забяспечыла хворых належным лячэннем. Немцы пабачылі ў асобе Ангелы Меркель лідара, якому можна давяраць, і паслухмяна выконвалі рэкамендацыі яе ўрада па сацыяльнаму дыстанцыраванню.
Але сёння Германія бачыць новы ўсплеск хваробы. Сярод фактараў, адказных за гэта, называюць халоднае надвор’е, павольную вакцынацыю бустарнымі прышчэпкамі і рост выпадкаў кавіду ў суседніх усходнееўрапейскіх краінах — напрыклад, у Чэхіі. Тое, што ў Германіі зараз пераходны перыяд паміж сыходам аднаго ўрада і прыходам новага, не спрыяе эфектыўнай барацьбе з крызісам.
Адмова ад прышчэпак як рухавік эпідэміі
Эксперты сходзяцца ў меркаваннях, што асноўная віна за новы ўсплеск пандэміі ляжыць на тых немцах, хто не прайшоў вакцынацыю. Яшчэ ў пачатку лета медыкі папярэджвалі, што праз высокую заразнасць штама «дэльта» трэба вакцыніраваць як мінімум 85% насельніцтва, каб пазбегнуць крызіса ў сістэме аховы здароўя.
Сёння ў Германіі лічба вакцыніраваных не дацягвае і да 70%. Гэта больш, чым у шматлікіх краінах Цэнтральнай і Ўсходняй Еўропы, аднак менш, чым у большасць заходнееўрапейскіх краін. Напрыклад, у Бельгіі, Даніі і Італіі тры чвэрці насельніцтва прайшлі поўную вакцынацыю, а ў Партугаліі лічба вакцыніраваных набліжаецца да 90%.
Прычына такіх нізкіх лічбаў — нямецкія антываксеры, якіх асабліва шмат на тэрыторыі былой ГДР. Вялікай папулярнасцю там карыстаецца ўльтраправая партыя «Альтэрнатыва для Германіі». Цікава, што Ціна Крупала і Аліс Вайдэль, лідары фракцыі гэтай партыі ў парламенце, абое адмовіліся ад прышчэпкі — і абое ў апошні час здалі станоўчыя тэсты на кавід.
Колькасць хворых таксама расце ў частках дзвюх паўднёвых нямецкіх земляў — Баварыі і зямлі Бадэн-Вюртэнберг. У гэтых багатых рэгіёнах дужа папулярны рух Querdenker, што выступае супраць агульнапрынятых метадаў барацьбы з кавідам.
Урады некаторых нямецкіх земляў цяпер жадаюць увесці больш жорсткія меры барацьбы з пандэміяй. Размова ідзе ў тым ліку пра больш строгія патрабаванні нашэння масак і пра тое, што для ўваходу ў грамадскія аб’екты спатрэбіцца доказ вакцынацыі ці перанесенай інфекцыі. Аднак пакуль невядома, ці хопіць гэтых мер.
Каментары