У Саудаўскай Аравіі правялі самае масавае пакаранне смерцю за ўсю гісторыю гэтай дзяржавы
У Саудаўскай Аравіі ў суботу правялі масавае пакаранне смерцю, падчас якога быў абезгалоўлены 81 чалавек. Пра гэта паведаміла агентцтва Associated Press.
Пакаранне стала самым масавым у сучаснай гісторыі Саудаўскай Аравіі. Усе пакараныя былі прызнаныя вінаватымі ў забойствах і удзеле ў тэрарыстычных арганізацыях «Аль-Каіда» і ІДІЛ, а таксама ў дапамозе еменскім паўстанцам з руху хусітаў.
«Каралеўства працягне сваю строгую і непахісную палітыку ў дачыненні да тэрарызму і экстрэмісцкіх арганізацый, якія пагражаюць стабільнасці ўсяго свету», — гаворыцца ў заяве ўладаў Саудаўскай Аравіі з гэтай нагоды.
Раней, у 1980 годзе, улады пакаралі смерцю 63 баевікоў, якія захапілі закладнікаў у найбуйнейшай мячэці горада Мекі ў 1979 годзе.
Апошняе масавае пакаранне смерцю ў каралеўстве было здзейснена ў студзені 2016 года, калі былі абезгалоўленыя 47 чалавек.
Каментары