Анджэй Дуда: Прымяненне Пуціным хімічнай зброі дасць НАТА зялёнае святло
Прэзідэнт Польшчы Анджэй Дуда заявіў, што НАТА пераглядзіць сваю пазіцыю аб неўмяшанні ў канфлікт ва Украіне ў тым выпадку калі Расія прыменіць хімічную зброю.
Раней пра магчымасць хімічнай атакі з боку Расіі папярэдзіў генеральны сакратар НАТА Енс Столтэнберг. На ягоную думку, заявы Масквы аб тым, што ва Украіне нібыта працуюць лабараторыі па вытворчасці хімічнай і біялагічнай зброі, могуць быць падрыхтоўкай да такога кроку з боку самой Расіі.
Столтэнберг заявіў, што Крэмль працягвае шукаць розныя зачэпкі, каб апраўдаць свае дзеянні, і папярэдзіў, што прымяненне хімічнай зброі будзе адназначна расцэнена як ваеннае злачынства.
Польскі лідар таксама лічыць, што расійскае кіраўніцтва можа пайсці на гэты крок.
«Калі вы пытаецеся ў мяне, ці можа Пуцін прымяніць хімічную зброю, то, на маю думку, у дадзены момант Пуцін можа прымяніць усё, што заўгодна, асабліва калі ён у цяжкай сітуацыі. Ён ужо прайграў гэтую вайну з палітычнага пункту гледжання і з ваеннага ён таксама відавочна не выйграе», — сказаў Анджэй Дуда ў інтэрв'ю Бі-бі-сі.
Прымяненне зброі масавага паражэння зменіць усе правілы гульні, сказаў Дуда. Бо тады пагроза навісне не толькі над Еўропай, але і над усім светам, і НАТА трэба будзе нешта вырашаць, папярэдзіў ён.
Каментары