Вільня
У 2017 і 2018 гадах у Літве пражывала 46 000-49 000 замежнікаў, у 2019 годзе — 58 000, у 2020-м — 73 800, у 2021-м — ужо 87 300. У пачатку 2022 года від на жыхарства ў Літве ці нацыянальная віза была ў 100 200 замежнікаў.
Гестаўтайтэ сказала, што больш за ўсё часовых відаў на жыхарства выдалі беларусам і ўкраінцам (адпаведна 20 500 і 19 600). Каля 3600 чалавек прыехалі з Расіі, менш за 1000 відаў на жыхарства атрымалі грамадзяне Індыі, Узбекістана, Кыргызстана, Малдовы, Казахстана, Нігерыі і Грузіі.
Больш за ўсё нацыянальных віз таксама выдалі беларусам — 21 300, украінцам — 12 100, расейцам — 2800.
Калі сплюсаваць колькасць ВНЖ і нацыянальных віз, выдадзеных Літвой беларусам, атрымліваецца, што 41 800 нашых суайчыннікаў жывуць сёння ў Літве. Гэта як цэлыя Калінкавічы ці Ваўкавыск.
Хваля эміграцыі з Беларусі, выкліканая жорсткімі рэпрэсіямі супраць грамадзянскай супольнасці пасля выбараў 2020-га года, узмацнілася пасля ўварвання Расеі ва Украіну. Многія бізнэсы сутыкнуліся з немагчымасцю далейшай працы і вялікімі рызыкамі ва ўмовах, калі Беларусь выкарыстоўваецца Расеяй для атакі на Украіну і прызнаецца сусветнай супольнасцю пасіўным суагрэсарам, і пачалі актыўную рэлакацыю супрацоўнікаў.
Раней стала вядома, што дазвол на жыхарства ў Польшчы маюць 50 тысяч беларусаў, 45 тысяч з іх выехалі з краіны пасля жніўня 2020-га.
