Незвычайны выпадак нядаўна адбыўся ў Гомелі — капітан рачнога судна ездзіў па рацэ ў нецвярозым стане і мог нарабіць бяды, паведамляе «Гомельская праўда».
У мінулую пятніцу а 8-й гадзіне вечара на гарадскую выратавальную станцыю паступіў сігнал, што па Сажы хаатычна дрэйфуе катэр, што выглядае небяспечна. Катэр прайшоў уздоўж пірса, закрануўшы вуды рыбакоў.
Да парушальніка накіраваліся ратавальнікі, аднак мужчына на катэры паводзіў сябе не зусім адэкватна. Аднак дзякуючы сумесным дзеянням ратавальнікаў і міліцыі капітан судна быў неўзабаве затрыманы. У яго былі заўважныя прыкметы алкагольнага ап'янення. Па гэтым факце праводзіцца праверка.
На Гомельшчыне, дарэчы, сёлета ўжо зафіксаваны выпадак падзення з лодкі. Мужчына трапіў пад уласны матор і атрымаў цяжкія траўмы. Выратаваць яго не ўдалося.
Каментары