У Гомелі чарговы палітычны прысуд за каментарый. Каб затрымаць абвінавачанага, зладзілі цэлую спецаперацыю
Гомельца Уладзіміра Рабчанку абвінавачвалі паводле арт. 130 ч. 1 (распальванне расавай, нацыянальнай, рэлігійнай альбо іншай сацыяльнай варожасці) і арт. 369 (знявага прадстаўніка ўлады) за каментарыі ў бок прадстаўнікоў улады і сілавікоў, якіх мужчына, па меркаванні следства, абражаў у тэлеграм-чатах.
Як паведамляе «Гомельская вясна», падчас суда стала вядома, што Уладзімір Рабчанка пакінуў каментарый «Понимает тварь, что за всё ответить придётся» пад пастом пра намесніка міністра МУС РБ Генадзя Казакевіча ў чаце «Кіберпартызаны», а яшчэ пісаў каментарыі з «негатыўнай ацэнкай» супрацоўнікаў МУС, суддзяў, дзяржаўных службоўцаў, супрацоўнікаў УС.
Каб затрымаць Рабчанку, сілавікі зладзілі цэлую спецаперацыю: яны выклікалі на допыт старога сябра мужчыны — Станіслава Анзэля, атрымалі доступ да яго мабільнага тэлефона і такім чынам вышуквалі каментарыі Уладзіміра. Падчас суда Анзэль патлумачыў, што распавядаў супрацоўнікам міліцыі, што ў чатах з боку Уладзіміра «былі выказванні, пасля якіх ён мог пацярпець».
«Я разумеў, што мяне могуць выкарыстаць як інструмент, і мне вельмі сорамна перад Валодзем», — сказаў Станіслаў у судзе.
Сам Уладзімір Рабчанка ў судзе прызнаў сваю віну. Суддзя Гомельскага абласнога суда Алег Харошка пастанавіў пакараць мужчыну двума з паловай гадамі пазбаўлення волі ў калоніі агульнага рэжыму, а таксама аштрафаваў на 100 базавых велічынь. Мабільны тэлефон Рабчанкі суддзя вырашыў канфіскаваць у даход дзяржавы.
Падпалкоўніка з факультэта вайсковай разведкі судзяць за «здраду дзяржаве» па справе, якая выглядае палітычнай. Што пра яго вядома?6
Каментары