«І хочам, каб гэты працэс ішоў больш дынамічна, з прыцягненнем інвестыцый у эканоміку».
«Мы пацвярджаем, што вядзём актыўную работу па прыватызацыі, хочам, каб гэты працэс ішоў больш дынамічна, з прыцягненнем інвестыцый у эканоміку», — пра гэта заявіў сёння прэм’ер‑міністр Беларусі Сяргей Сідорскі на сустрэчы са старшынёй наглядальнага савета польскай інвестыцыйнай і кансалтынгавай кампаніі «А Ка Йот Інвестмент».
Сяргей Сідорскі нагадаў, што першы раз з прадстаўнікамі польскай кампаніі ён сустрэўся 1 верасня ў Гданьску. Сёння беларускі бок гатовы прадоўжыць дыялог. «Цяпер мы прынялі рашэнне аб стварэнні ў Беларусі кансалтынгава‑інвестыцыйнай кампаніі з удзелам «А Ка Йот Інвестмент», — адзначыў прэм’ер.
Ён канстатаваў, што ў Беларусі актыўна акцыяніруюцца прадпрыемствы з дзяржаўным капіталам.
Больш як 40 працэнтаў прадпрыемстваў Беларусі — акцыянерныя таварыствы.
«Нам хацелася б, каб гэты працэс ішоў больш актыўна і прыцягваў на гэтыя прадпрыемствы інвестыцыі. Але Беларусь зацікаўлена не ў самой прыватызацыі, а ў тым, каб акцыяніраваныя прадпрыемствы разглядаліся як патэнцыяльныя для стварэння новых вытворчасцей, канкурэнтаздольнай прадукцыі сённяшняга і заўтрашняга дня», — падкрэсліў кіраўнік беларускага ўрада.
Сяргей Сідорскі выказаў упэўненасць у тым, што сустрэча паслужыць далейшаму развіццю адносін і вырашэнню многіх пытанняў па прыватызацыі. Пры гэтым прэм’ер‑міністр адзначыў, што беларускі бок не скрывае інфармацыю аб вядзенні перагавораў па пытаннях прыватызацыі з іншымі кансалтынгавымі кампаніямі. «Чым хутчэй мы знойдзем узаемаразуменне, кампраміс, тым хутчэй будуць вырашацца гэтыя пытанні і развівацца працэс прыватызацыі», — дадаў ён. Сяргей Сідорскі выказаў упэўненасць, што польская кампанія будзе ўдзельнічаць у гэтым працэсе.
Пэўным этапам па прыватызацыі ў Беларусі з’яўляецца работа па стварэнню прыватызацыйнага агенцтва.
Прэм’ер‑міністр дадаў, што не выключана і іншая форма работы, якая дасць большы рух у працэсе прыватызацыі.
Беларусь зацікаўлена ў супрацоўніцтве з кампаніяй «А Ка Йот Інвестмент» і чакае ад яе канкрэтных прапаноў па развіццю прыватызацыйнага працэсу ў краіне. Сяргей Сідорскі падкрэсліў, што інтарэс да кампаніі заснаваны не столькі на яе кансалтынгавых функцыях. «Нам хацелася б працаваць з вамі па прыцягненню інвестыцыйных рэсурсаў і выкарыстоўваць тут існуючы ў вас вопыт», — сказаў прэм’ер.
Старшыня наглядальнага савета «А Ка Йот Інвестмент» Ян Вага паведаміў, што пасля сустрэчы ў Гданьску падрыхтаваны прапановы па прыватызацыі. Дваццацігадовы вопыт польскіх прадпрыемстваў, у прыватызацыі якіх удзельнічала кампанія, можа быць выкарыстаны ў Беларусі. «Прыватызацыя павінна падрыхтаваць прадпрыемствы, каб яны занялі добрае, канкурэнтаздольнае месца ў сусветнай эканоміцы», — сказаў Ян Вага. Галоўнае ў гэтым працэсе, лічыць ён, папаўненне бюджэту. Кампанія гатова выкарыстаць усе свае магчымасці для работы ў Беларусі, падкрэсліў польскі госць.
Група «А Ка Йот Інвестмент» — вядучая прыватная польская інвестыцыйная і кансалтынгавая кампанія. Асноўны від дзейнасці — кіраванне прыватнымі інвестыцыйнымі фондамі, ажыццяўленне інвестыцый у інавацыйнай сферы, на рынку нерухомай маёмасці, а таксама бізнес‑ і фінансавы кансалтынг. За апошнія 15 гадоў кіраўнік групы Ян Вага рэалізаваў інвестыцыйныя праекты на агульную суму амаль $5 млрд.
«А Ка Йот Інвестмент» прапануе кансалтынгавыя паслугі па пытаннях зліцця і рэарганізацыі прадпрыемстваў, прапрацоўцы стратэгіі развіцця, рэструктурызацыі фондаў. Кансалтынг па пытаннях рэалізацыі праектаў у сферы НДВКР ажыццяўляецца асобнай даччынай кампаніяй «Цэнтр інавацый і тэхналагічных інвестыцый». Інвестыцыйная дзейнасць «А Ка Йот Інвестмент» ажыццяўляецца праз шэраг інвестыцыйных фондаў.
Каментары