У Брэсце вынеслі прысуд расійскаму гандбалісту, які моцна збіў мясцовага жыхара. Беларусам за каментары даюць нашмат больш
Працэс над 25-гадовым гульцом гандбольнага клуба «Данскія казакі» — ЮФУ (Таганрог) Аляксандрам Сініцыным праходзіў на гэтым тыдні ў судзе Маскоўскага раёна Брэста. Расійскі спартсмен быў затрыманы 10 жніўня каля рэстарана-караоке «Жэмчуг» і змешчаны ў ізалятар часовага ўтрымання пасля канфлікту на тэрыторыі гэтай установы. Абвінавачванне яму было прад'яўлена па ч. 2 арт. 339 КК РБ (злоснае хуліганства), піша «Брестская газета».
Летам гэтага года «Данскія казакі» правялі ў Брэсце міжсезонны збор. У жніўні яны паўдзельнічалі ў традыцыйным «Кубку Белгазпрамбанка». Пасля адной з гульняў турніру каманда адпачывала ў караоке-бары, дзе паміж Сініцыным і работнікам установы адбыўся канфлікт.
Паводле версіі абвінавачання, Аляксандр Сініцын, які знаходзіўся ў нецвярозым стане, прыблізна ў 5.10 раніцы 10 жніўня ўдарыў, а затым жорстка збіў аднаго з супрацоўнікаў караоке-бара пасля таго, як той зрабіў яму заўвагу аб непрыстойных паводзінах: за некалькі хвілін да таго расіянін спраўляў патрэбу проста пад дзвярыма ўстановы.
Пасля таго, як паміж абвінавачаным і пацярпелым адбылася слоўная сварка, работнік установы пайшоў ўсярэдзіну памяшкання. Мяркуючы па ўсім, Сініцын вырашыў адпомсціць берасцейцу за зробленую заўвагу, палічыўшы яе абразай для сябе. Ён паклікаў на дапамогу сваіх таварышаў па камандзе Мікіту Далганава і Глеба Чарнова. Утрох яны сталі выманьваць супрацоўніка ўстановы на вуліцу, моцна стукалі ў дзверы. Пасля таго, як той зноў выйшаў, было жорсткае збіццё. Удары наносіў Сініцын.
Калі пацярпелы ўпаў на зямлю ў выніку першага моцнага ўдару па твары, расіянін нанёс яму яшчэ каля дзесяці ўдараў рукой па галаве і іншых частках цела і адзін удар нагой. У выніку супрацоўнік «Жэмчугу» апынуўся на бальнічнай койцы са шматлікімі пераломамі і іншымі цялеснымі пашкоджаннямі. Ён да гэтага часу лечыцца ад атрыманых траўмаў і пашкоджанняў.
Медыцынскі агляд затрыманага гандбаліста, зроблены прыкладна праз тры гадзіны пасля інцыдэнту, паказаў 0,43 праміле алкаголю ў крыві.
Праз два тыдні пасля затрымання гульца кіраўніцтва каманды распаўсюдзіла інфармацыю аб тым, што здарэнне ў клубе лічаць «правакацыяй супраць расійскага грамадзяніна». Гендырэктар «Данскіх казакоў» Яўген Сямак так растлумачыў прычыну гэтай высновы: «Ёсць факт, які пацвярджае, што былі сказаныя такія словы: «Вы, рускія, прэч адсюль». Аднак у матэрыялах справы гэтая версія, відавочна, не знайшла свайго пацверджання.
Сам спартсмен сваю віну цалкам прызнаў і выказаў «чыстасардэчнае раскаянне». Ён таксама заплаціў пацярпеламу берасцейцу 13 тысяч рублёў у кошт кампенсацыі маральнай шкоды і выдаткаў на лячэнне. Сам пацярпелы заявіў, што прэтэнзій да Сініцына не мае.
7 кастрычніка суд вынес расіяніну прысуд — 3 месяцы арышту.
Чытайце таксама:
Расійскі гандбаліст, якога затрымалі за бойку ў караоке ў Брэсце, абразіўся на фразу «Вы, рускія, ідзіце адсюль»?
Чэмпіён Расіі па гандболе сядзіць у брэсцкім СІЗА за бойку ў караоке
Цяпер чытаюць
Вось хто той хлопец, які паехаў на праполку бульбы і стаў героем сацсетак4
Каментары