Станцыя Мацкава, дзе пасажыры перасаджваюцца з літоўскага цягніка ў польскі
«Планы папрацаваць коцяцца ў пекла»
Да нядаўняга часу трапіць з польскай сталіцы ў літоўскую ці наадварот можна было толькі аўтобусам ці авіярэйсам. У снежні, пасля 9-гадовага перапынку, быў адноўлены чыгуначны маршрут, які звязаў Кракаў, Варшаву, Беласток, Коўна і Вільню.
Расклад абяцае, што з Вільні ў Варшаву цягнік завязе за 9 гадзін. Аднак польская чыгунка не пунктуальная, затрымкі тлумачацца загружанасцю.
Акрамя спазнення, пасажыраў чакаюць і іншыя неспадзяванкі.
«Ранкам прыязджаю я на вакзал. Там даведваюся, што з цягніком штосьці здарылася, таму замест яго паедзе іншы, але ён адыходзіць з іншага варшаўскага вакзала. Добра, што цягнік спецыяльна затрымалі, каб людзі маглі даехаць ад аднаго вакзала да другога», — апісвае ў сацсетках падарожжа з Варшавы ў Вільню Зміцер.
«У замененым цягніку, — расказвае ён далей, — ні разетак, ні інтэрнэту, ні вагона-рэстарана. Таму планы папрацаваць коцяцца ў пекла».
У Літве на станцыі Мацкава пасажыры перасаджваюцца з літоўскага цягніка на польскі (ці наадварот). Тлумачыцца тое розніцай шырыні каляі.
«Да мяжы неяк дабраліся, — працягвае Зміцер. — Далей перасадка ў літоўскі цягнік — ён ужо стаіць на тым жа пероне, таму хадзіць далёка не трэба. У гэтым цягніку ўжо і хуткі інтэрнэт, і разеткі, і кавы можна набыць. Але крэслы і дыстанцыя паміж імі — для тых, хто задаволіцца порцыямі ў літоўскіх ці беларускіх рэстарацыях. Ледзь улез, даехаў-такі…»
Адваротным шляхам Зміцер таксама застаўся незадаволены.
«З літоўскім цягніком нічога не змянілася, выпіў там кавы, з’еў буцік і еду. Але незадоўга да мяжы даведваюся, што ніякі цягнік з польскага боку нас не чакае, — адзначае ён. — Яго тупа няма.
Усіх, хто едзе да Варшавы, пакуюць у пабачыўшы віды аўтобус і вязуць да Беластока, дзе адбудзецца чарговая перасадка ўжо ў цягнік (спадзяюся).
Найбольш гэтым развіццём падзей усцешаныя сем’і з немаўлятамі, якія адмыслова выбіралі падарожжа цягніком. А ў мяне цяпер замест вай-фаю, разеткі і вагона-рэстарана — кіргізы, якія сядзяць побач і слухаюць расійскі шансон».
Аўтар паста жартаўліва адзначае, што для кіраўніцтва РКР (Польскай нацыянальнай чыгункі) «у пекле ёсць асобны кацёл».
«Польскія вагоны больш прасторныя, а літоўскія — больш сучасныя»
Іншая беларуска, якая цяпер жыве ў Варшаве, ездзіла гэтым рэйсам на гэтым тыдні. Усё прайшло без нараканняў.
«Так, у польскім вагоне няма вай-фаю, але пра гэта адразу папярэджвалася, пісалася, што ён толькі на літоўскім участку маршруту. Гэта мне ніяк не замінала працаваць, я прывыкла да такіх умоў прыстасоўвацца», — кажа дзяўчына.
Яе цягнікі прыйшлі без спазненняў.
Яна таксама заўважае, што польскія вагоны больш прасторныя за літоўскія, а літоўскія больш сучасныя.
«Дарога заняла 14 гадзін»
Свае ўражанні ад паездкі ў сацсетках апісала Юлія. Яна чакала, што паездка зойме 9 гадзінаў, як было заяўлена ў раскладзе, але выйшла іначай. Акрамя таго, дзяўчына разлічвала, што падчас доўгага падарожжа цягніком у ім будзе вагон-рэстаран.
«Нас перасадзілі з цягніка ў аўтобус на шляху ў Вільню яшчэ ў Польшчы, мы ехалі да перасадкі ў Літве на іншы цягнік 7 гадзін! У выніку ўся дарога заняла 14 гадзін, вагона-рэстарана ў польскім цягніку ў прынцыпе няма і на зваротным шляху мы бегалі па ежу ў Беластоку.
Я больш на гэтым цягніку «прамым» не паеду, лепш ужо на аўтобусе ці машыне».
«Калі камфорт і чысціня становяцца будзённасцю, то дробязі раздражняюць»
Месяцы два таму цягніком ездзіў Андрэй, яго паездка прайшла добра.
Ён кажа, што час ад часу карыстаецца паслугамі польскай і літоўскай чыгунак. Найперш яму імпануе, што вагоны сучасныя, ёсць інтэрнэт, што робіць паездку камфортнай.
«Беларусы абураюцца, хутчэй за ўсё, з-за таго, што ў польскай чыгунцы няма стабільнасці руху. Цягнікі нярэдка спазняюцца, і наогул не прыязджаюць. У Беларусі мы прывыклі, што ўсё «жэстачайшэ», — тлумачыць Андрэй.
Ён лічыць, што калі камфорт і чысціня становяцца будзённасцю, дробязі з нязручнасцю пачынаюць раздражняць.
«Хаця, — дадае ён, — у спазненнях цягнікоў ёсць плюсы. Памятаю, з-за затору на дарозе не паспяваў на цягнік, які, як высветлілася, таксама спазніўся, і я прыехаў за хвіліну да яго адпраўлення. Цягніка пасажыры на пероне чакалі лішнія 30 хвілін».
Правадніцы раілі браць падсілак на польскі адцінак дарогі
Першы рэйс з Вільні ў Варшаву апісваў літоўскі журналіст Арыюс Гаcанавас.
Паводле яго, дарогаю па Літве wi-fi быў дастатковы, каб праглядаць сацыяльныя сеткі, чытаць навіны і карыстацца электроннай поштай.
Прадавалі бутэрброды за 2,95 еўра, маленькія пончыкі па 2,30 еўра, а таксама шакаладныя батончыкі за 1,20 еўра, чай 1,40 еўра, кава 1,90 еўра, паўлітра вады — 1,15 еўра.
Журналіст напісаў, што правадніцы раілі пасажырам набываць падсілак, каб яго хапіла і на польскі адцінак дарогі.
Польскі цягнік спазніўся на станцыю Мацкава на 5 хвілін. Пасажыры чакалі яго не выходзячы з вагонаў.
У вагонах польскага цягніка не ўсе разеткі і лямпачкі працавалі. Не было дзе купіць вады і ежы.
У Варшаву цягнік прыехаў са спазненнем на 40 хвілін. У Кракаве яно расцягнулася на гадзіны.
Цана білета з Вільні да Варшавы — 25 еўра (77 рублёў), а да Кракава — 30 еўра (93 рублі). Для дзяцей да 12 гадоў — зніжкі. За ровар давядзецца даплаціць 10 еўра (31 рубель), а за жывёлу — 5 еўра (15 рублёў).
Чыгункай з Варшавы да Вільні — 393 кіламетры.
«Наша Нiва» — крыніца якаснай інфармацыі і бастыён беларушчыны
ПАДТРЫМАЦЬ «НН»Чытайце таксама:
Куды паехаць. Закапанэ і польскія Татры — горы і шалёныя панарамы
«Мінсктранс» адмяніў рэйсы на Новы год у Рыгу, Вільню, Коўна і Варшаву
а каму бач ты не хапае рэстарана і вай-фаю...