Мінпрыроды нагадала пра недапушчальнасць выпальвання сухой травы. І расказала пра немалыя штрафы
Міністэрства прыродных рэсурсаў і аховы навакольнага асяроддзя нагадала, што ў Беларусі забароненыя сельскагаспадарчыя палы і выпальванне сухой расліннасці. Інфармацыя пра гэта размешчаная на сайце ведамства.
Пераважная большасць пажараў у экасістэмах, па даных Мінпрыроды, адбываецца па віне людзей, а на долю ўмоў надвор'я прыпадае толькі 5-10% такіх выпадкаў.
У ведамстве таксама абвяргаюць стэрэатып пра тое, што выпальванне леташняй травы спрыяе яе росту ў перспектыве. Спецыялісты адзначаюць, што попел пасля палу ніяк не паляпшае якасць глебы, бо губляюцца азотныя злучэнні. Больш за тое — у агні знішчаецца карысная мікрафлора, перш за ўсё тая, што дапамагае раслінам выстаяць у выпадку хваробы.
Таксама ў працэсе гарэння ў атмасферу паступае вуглякіслы газ. Рэшткі ядахімікатаў і ўгнаенняў у агні ўтвараюць таксічныя злучэнні. Уздоўж дарог пры выпальванні сухой травы паветра забруджваецца цяжкімі металамі.
У Мінпрыроды нагадалі пра меры пакарання за такую дзейнасць.
За незаконнае выпальванне сухой расліннасці, траў на корані, а таксама іржышча і пажніўных рэшткаў на палях або непрыняцце мер па ліквідацыі палаў прадугледжаны штраф ад 10 да 30 базавых велічынь (1 базавая — 37 рублёў).
За развядзенне вогнішчаў у забароненых месцах парушальнік заплаціць да 12 базавых.
Калі будзе ўсталяваны факт прычынення шкоды навакольнаму асяроддзю, віноўнік панясе грамадзянска-прававую адказнасць. Памеры кампенсацыі ў такім выпадку рэгламентаваныя пастановай Саўміна ад 11 красавіка 2022 года №219.
Цяпер чытаюць
На поўначы Беларусі існавала велізарнае возера — у 150 разоў большае за Нарач. Яно знікла ў выніку прыроднай катастрофы, але сляды заўважныя і сёння77
Каментары