Ва Украіне завочна арыштавалі беларуса, якога тры гады таму абмянялі на ўкраінскага журналіста
Ва Украіне суд завочна ўзяў пад варту грамадзяніна Беларусі Юрыя Палітыку, якога тры гады таму абмянялі на ўкраінскага журналіста, а месяц таму абвясцілі ў міжнародны вышук праз ігнараванне судовых пасяджэнняў, паведамляе «Радыё Свабода».
Беларус, якога 4 кастрычніка 2019 года абмянялі на асуджанага ў Беларусі ўкраінскага журналіста Паўла Шаройку, больш за тры гады не з'яўляўся на судовыя пасяджэнні, дзе мусіла разглядацца ягоная справа. Спачатку ён тлумачыў немагчымасць прыезду ва Украіну абмежаваннямі праз пандэмію каранавіруса, потым праз баявыя дзеянні ва Украіне і адсутнасць транспартнага злучэння паміж Украінай і Беларуссю.
Адной з умоў абмену Палітыкі ў 2019 годзе быў ягоны абавязковы ўдзел у пасяджэннях суда, бо Павел Шаройка ўжо атрымаў на той момант вырак у Беларусі.
Нядаўна стала вядома, што адвакат Палітыкі Тарас Герэлюк, які абараняў беларуса паводле камерцыйнай дамовы і кантактаваў з беларускімі дыпламатамі ў Кіеве, пасля пачатку поўнамаштабнай вайны з Расіяй з'ехаў з Украіны і цалкам адмовіўся ад юрыдычнай дзейнасці. Цяпер ён займаецца харчовым бізнэсам у Вялікабрытаніі.
Другая адвакатка, прызначаная Юрыю Палітыку на бясплатнай аснове, Валянціна Рагавец, пасля пачатку вайны таксама выехала ў адну з еўрапейскіх краін і паведаміла суду, што не падтрымлівае сувязі з абвінавачваным у шпіянажы беларусам.
Суд прызначыў «беларускаму шпіёну» новага адваката, які пагадзіўся з абвяшчэннем Юрыя Палітыкі ў міжнародны вышук «з улікам матэрыялаў крымінальнай справы і адпаведна закону».
Беларускага грамадзяніна Юрыя Палітыку затрымалі праз падазрэнне ў шпіянажы ў чэрвені 2017 года на ўкраінскім памежным пераходзе «Новыя Ярылавічы» на мяжы з Беларуссю. Ён адседзеў у следчым ізалятары Чарнігава да кастрычніка 2019 года, пакуль яго не абмянялі на ўкраінскага журналіста Паўла Шаройку, затрыманага ў Беларусі па аналагічным абвінавачанні і асуджанага на восем гадоў пазбаўлення волі.
Цяпер чытаюць
Беларуска наракае, што сем гадоў не можа знайсці пастаянную працу. А ў эміграцыі стала яшчэ складаней16
Каментары