У Ціхім акіяне акулы патапілі катамаран расійскай даследчай экспедыцыі
Экіпажу ўдалося выратавацца.
Экіпаж кругасветнай экспедыцыі Russian Ocean Way у складзе Яўгена Кавалеўскага, Станіслава Бярозкіна і Вінсэнта Томаса Эцьена падвергнуўся нападу акул у Ціхім акіяне, прыкладна за 835 кіламетраў на паўднёвы ўсход ад Кэрнса ў Аўстраліі, паведамляе sibtraveler.com.
Першая атака акул кукікатараў адбылася 4 верасня, тады пашкоджанні атрымаў задні левы балон катамарана. У выніку гэтага ён цалкам пагрузіўся пад ваду. У аварыйным стане падарожнікі пратрымаліся каля сутак, ім удалося прайсці прыкладна сто міль.
5 верасня ў 23:00 на судна зноў напалі акулы, і ўжо пракусілі правы балон. Катамаран страціў раўнавагу і пачаў тануць.
Экіпаж падаў сігнал SOS. Кіраўніца берагавога штаба Юлія Калюжная аператыўна звязалася з выратавальнай службай Аўстраліі, і ўжо праз 45 хвілін да катамарана падышоў сухагруз Dugong Ace, які плыў да Шанхая.
Экіпаж загрузіў на выратавальны карабель усе асабістыя рэчы, аднак эвакуяваць катамаран не ўдалося. На судне не было прыбораў для пагрузкі катамарана на борт. Капітанам выратавальнага судна было прынята рашэнне пакінуць катамаран у акіяне.
Цяпер каманда знаходзіцца на выратавальным караблі, які даставіць іх у Брысбен. У тэрміновым парадку ў Аўстралію вылятае Юлія Калюжная для вырашэння задач па далейшым працягу экспедыцыі.
Каментары