У Дзярждуме РФ расійскім «збеглым», якія падтрымліваюць Украіну, паабяцалі Магадан
Спікер Дзярждумы РФ Вячаслаў Валодзін заявіў, што рэлакантам, «якія радуюцца стрэлам па Расіі» і жадаюць перамогі Кіеву, лепш не вяртацца ў краіну, бо там ім «забяспечаны Магадан».
«Калі гаворым пра рэлакантаў, той, хто зʼехаў з краіны і здзейсніў подлыя ўчынкі, радаваўся стрэлам па тэрыторыі РФ, жадаў перамогі нацысцкаму крываваму кіеўскаму рэжыму, ён павінен усведамляць, што тут яго не толькі не чакаюць. Але калі ён прыедзе сюды, Магадан яму забяспечаны», — сказаў Вячаслаў Валодзін.
Валодзін адзначыў, што Расіі «не патрэбны» тыя, хто мігруе з дзяржавы ў дзяржаву, а потым вяртаецца назад. «Прыехалі, боты там пацалавалі, грошы, заробленыя тут грамадзянамі Расійскай Федэрацыі, заплацілі, каб ім пашпарты аформілі, а потым іх і адтуль выдварылі, і яны потым сюды прыкаціліся — нам яны не патрэбныя», — сказаў ён.
9 кастрычніка Дзмітрый Пяскоў, адказваючы на пытанне, ці не пагражае нешта пры вяртанні ў краіну расіянам, якія зʼехалі ў Ізраіль з пачатку баявых дзеянняў на Украіне і падчас мабілізацыі, сказаў: «Паслухайце, грамадзяне Расійскай Федэрацыі жывуць у шматлікіх краінах свету, і Расійская Федэрацыя — гэта іх радзіма. Як радзіма можа пагражаць?»
Дакладных звестак пра тое, колькі расіян пакінулі краіну з лютага 2022 года, няма. У лютым незалежны дэмограф Аляксей Ракша ацаніў колькасць расіян, якія пакінулі РФ у 2022 годзе, ад 450 тысяч да 800 тысяч чалавек, піша «Коммерсант».
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі1212
Каментары