У трэйлеры «Аватар: Апошні маг паветра» анімэ ператвараецца ў live-action
Netflix паказаў першы трэйлер экранізацыі аднаго з найпапулярнейшых анімэ-серыялаў сучаснасці.
Netflix яшчэ некалькі гадоў таму ясна даў зразумець свой намер стварыць live-action-версію аднаго з найпапулярнейшых анімэ-серыялаў «Аватар: Апошні маг паветра» (Avatar: The Last Airbender).
Простае вызначэнне live-action такое: у ім удзельнічаюць жывыя акцёры: рэальныя людзі ці жывёлы. Гэта не мультфільм, але і не тэрмін, які выкарыстоўваецца для адрознення ўсіх калі-небудзь створаных неанімацыйных фільмаў ад анімацыйных. Замест гэтага тэрмін live-action (ці «жывое дзеянне») адносіцца да неанімаваных персанажаў у анімаваным кантэксце. Падумайце пра Space Jam з Майклам Джорданам ці «Хто падставіў Труса Роджэра». Гэтыя фільмы ўключаюць у сябе рэальных акцёраў, а таксама анімацыйных персанажаў. То-бок live-action — гэта, так бы мовіць, жывая частка анімацыйнага фільма.
Яшчэ ў 2018 годзе пачала з’яўляцца інфармацыя, што абодва стваральнікі арыгінальнага мультсерыяла, Майкл Дантэ ДыМарціна і Браян Канецка, будуць распрацоўваць экранізацыю ад Netflix, але ў 2020 годзе шляхі аўтараў і студыі разышліся ў сувязі з творчымі рознагалоссямі. Нарэшце нядаўна стрымінгавая платформа абвясціла, што шоу выйдзе ў 2024 годзе, прэзентаваўшы першы сапраўдны трэйлер.
Уводзіны для тых, хто не глядзеў серыяла студыі Nickelodeon 2005 года, выглядаюць прыкладна так: у свеце, дзе людзі кантралююць адзін з чатырох элементаў — ваду, зямлю, агонь ці паветра — Аватар мае магчымасць кантраляваць усе з іх. Праз сто гадоў пасля таго, як Нацыя Агню фактычна заваявала свет, Катара і Сока, пара дзяцей з Племені Вады, знаходзяць дзіця Паветраных Качэўнікаў — Аанга. Неўзабаве героі разумеюць, што пасябравалі з Аватарам. Трое сяброў стаюць адзінай надзеяй знішчыць кіраўніка Нацыі Агню Азая. Героі пачынаюць падарожнічаць па свеце ў пошуках майстроў, якія могуць навучыць Аанга правільна кіраваць элементамі, што не з'яўляюцца паветрам, і пры гэтым не трапіць у палон да сына Азая, прынца-выгнанніка Зука.
Аватар ужо быў аднойчы экранізаваны ў 2010 годзе рэжысёрам М. Найтам Ш'ямаланам («Шостае пачуццё», «Няўразлівы», «Знакі», «Спліт») і не атрымаў вялікай любові гледачоў (на iMDb рэйтынг стужкі складае ўсяго 4.0 з магчымых 10 паводле 169 000 водгукаў). Страх паўторнага правалу навісае і над новай адаптацыяй, бо «Аватар» — гэта асаблівая рэч са шматлікай арміяй прыхільнікаў і таму асаблівымі чаканнямі.
Прэм’ера серыяла адбудзецца на Netflix 22 лютага 2024 г.
Цяпер чытаюць
«Пра які саюз можна гаварыць?» Лукашэнка ў Астане раскрытыкаваў Расію за навязванне утыльзбораў20
Каментары