Генштаб Украіны заявіў, што расійскія войскі спрабуюць наступаць па ўсім фронце
Расіяне наступаюць у раёнах Купянска, Крамянной, Бахмута, Аўдзееўкі, Мар'інкі і Рабоціна. Пра гэта гаворыцца ў зводцы Генеральнага штаба Узброеных Сіл Украіны.
Вайскоўцы заяўляюць, што за суткі на фронце адбылося 84 баявыя сутыкненні.
У кірунку Купянска былі адбітыя тры атакі — у раёнах Сінькоўкі і Петрапаўлаўкі.
Паблізу Крамянной беспаспяховымі з боку расіян, паводле Генштаба УСУ, былі 12 штурмаў — у раёнах Стэльмахоўкі, Серабранскага лясніцтва, Ямполаўкі, Торскага.
Пад Бахмутам украінскія войскі адбілі 28 нападаў — каля Багданаўкі, Іванаўскага, Кляшчэеўкі і Андрэеўкі. Адначасова працягваюцца штурмы на паўднёвым флангу.
Расейцы працягваюць спробы атачыць Аўдзееўку, але нясуць страты. УСУ адбілі 23 штурмы ў раёнах Новабахмутаўкі, Бярдзічаў, Аўдзееўкі, Опытнага, Паўночнага і Тоненькага.
Таксама адбітыя дзевяць нападаў у раёнах Мар'інкі і Новаміхайлаўкі.
У Запарожскай вобласці вораг тройчы контратакаваў каля Рабоціна і Новапракопаўкі.
Украінскія злучэнні, паводле Генштаба, працягваюць наступальную аперацыю ў кірунку Мелітопаля.
На левым беразе Дняпра ў Херсонскай вобласці ўкраінскія падраздзяленні ўтрымліваюць плацдарм, знішчаюць тылы праціўніка і вядуць контрбатарэйную барацьбу.
Каментары