Міністэрства антыманапольнага рэгулявання і гандлю падпісала з прадстаўнікамі айчынных гандлёвых сетак новае пагадненне аб працягу магчымасці надання сацыяльнай зніжкі некаторым катэгорыям насельніцтва.
Як паведамляе прэс-служба МАРГ, 13 гандлёвых сетак падпісалі пагадненне, згодна з якім яны абавязваюцца працягнуць дзеянне сацыяльных зніжак на другі квартал 2024 года.
На зніжку ў памеры 10%, як і раней, могуць разлічваць пенсіянеры, інваліды, шматдзетныя сем'і і маламаёмасныя беларусы. Яна распаўсюджваецца на шэраг найменняў тавараў (мясныя і малочныя вырабы, яйкі, хлеб, некаторыя гародніна і садавіна, крупы і г.д.), уключаных у пералік сацыяльна значных.
Адзначаецца, што са студзеня 2022 года, калі сістэма сацыяльных зніжак была ўпершыню ўкаранёная ў айчынным рытэйле, беларусы атрымалі больш за 2 млн сацыяльных картак, а сукупны памер дысконту за гэты час дасягнуў 64,6 млн беларускіх рублёў.
Каментары