У калоніі «Воўчыя норы» вязні сабралі грошы на рамонт і самі яго зрабілі
Асуджаныя зрабілі рамонт сваімі рукамі ў жылой секцыі атрадаў № 4 і № 7.
Грошы на будматэрыялы і нават сучасныя асвятляльныя прыборы былі сабраныя «на добраахвотных пачатках». Адказваў за збор сродкаў начальнік атрада № 7 капітан унутранай службы Сяргей Трыбухоўскі, піша Mayday.team.
Рамонт атрымаўся грандыёзным. У рэкордныя тэрміны асуджаныя сваімі рукамі замянілі электраправодку, зрабілі разводку і мантаж труб. Сцены пафарбавалі ў шэры колер з аранжавым аздабленнем і дэкорам пад камень. Зманціравалі асвятленне святлодыёднымі лямпамі, якое працуе ў трох рэжымах — верхні, асноўнае святло і бакавое асвятленне.
А адзін з вязняў у розных тэхніках вылепіў на сцяне аб'ёмную дэкаратыўную кампазіцыю ў выглядзе ранішняга лесу з вадаспадам і возерам.
Рамонт зрабілі і ў пакоі для мыцця — замянілі сантэхніку, а падлогу выклалі дэкаратыўнай пліткай з малюнкам пад камень.
Пра ўсё гэта адміністрацыя ПК-22 дазволіла аднаму з актывістаў распавесці ў лісце ў адрас газеты «Працоўны шлях» Дэпартамента выканання пакаранняў (ДВП) МУС. Гэта выданне для вязняў выходзіць два разы на месяц з красавіка 1955 года. У свабодным продажы або электронным выглядзе газеты няма, яна даступная толькі па падпісцы, а падпісвацца на яе прымушаюць саміх зняволеных.
У газеце нават ёсць спецыяльная рубрыка «Рамонт сваімі сіламі», у якой, як прыклад, апісваюць розныя варыянты выбівання грошай са сваякоў на правядзенне рамонтаў. У залежнасці ад выдаткаванай сумы хтосьці з асуджаных пойдзе на УДВ.
Газета «Працоўны шлях» у будучыні можа стаць скарбніцай для расследаванняў злоўжыванняў у сістэме ДВП.
Цяпер чытаюць
На Мінскім паўмарафоне памёр 50‑гадовы бягун. Вось што вядома пра Аляксея Дашыневіча12
Каментары