Завеі і моцныя снегапады бушуюць па большай частцы тэрыторыі краіны.
Як і прагназавалася, магутны атлантычны цыклон прынёс у Беларусь снегапады, завеі і парывісты вецер,
паведаміла галоўны сіноптык Рэспубліканскага гідраметэацэнтра Вольга Фядотава.
Непагадзь бушуе на большай частцы тэрыторыі краіны.
Парывы паўднёвага ветру ў першай палове дня сягалі 13—15 метраў за секунду, адзначалася інтэнсіўнае падзенне атмасфернага ціску.
Складаныя ўмовы надвор’я, паводле разлікаў сіноптыкаў, захаваюцца да канца дня. У другой яго палове хуткасць ветру ў многіх раёнах можа дасягаць 15—20 метраў за секунду. Тэмпература паветра будзе вагацца ад 4 градусаў марозу на паўднёвым захадзе краіны да мінус 13 градусаў на паўночным усходзе.
У сувязі з гэтым Рэспубліканскі гідраметэацэнтр рэкамендуе па магчымасці адкласці далёкія паездкі на асабістым аўтатранспарце і быць вельмі асцярожнымі на дарогах.
З пятніцы атлантычны цыклон будзе павольна перамяшчацца з поўдня Балтыйскага мора на раёны Латвіі. На фоне паніжанага атмасфернага ціску на большай частцы Беларусі пройдзе снег, месцамі з завеямі, на асобных участках дарог галалёдзіца. Тэмпература паветра ў ноч на пятніцу складзе 6‑13 градусаў марозу, днём чакаецца мінус 3‑9 градусаў.
Цяпер чытаюць
«Калі пасадзяць зноў, то пасяджу». Пачобут пра сваё вызваленне, камеры смяротнікаў, бітву за гонар у судзе і жаданне вярнуцца1
Каментары