Стаў вядомы першы выпадак гібелі на вайне жанчыны, якая заключыла кантракт з Мінабароны РФ у калоніі
У канцы жніўня ў Белгарадскай вобласці Расіі памерла 37-гадовая Алена Піманенкава — ваеннаслужачая расійскага штурмавога ўзвода, паведамляе «Перекресток-Инфо».
Сястра загінулай распавяла, што Піманенкаву, якая служыла «стралком-санітарам», нібыта збіла машына.
Алена падпісала кантракт з Мінабароны Расіі ў маі, знаходзячыся ў жаночай калоніі ў Ленінградскай вобласці. Жаданне паехаць на вайну выказалі 60 жанчын, з якіх адабралі дзесяць — «глядзелі на артыкулы і псіхатып».
Сярод іх была і Алена, якой да заканчэння тэрміну заставаўся адзін год.
Жанчына мела як мінімум шэсць судзімасцяў, выявілі «Важныя гісторыі».
Упершыню яе асудзілі ў 23 гады — за напад на мужчыну з нажом. Затым — за рабаванні, крадзеж, пашкоджанне чужой маёмасці, пагрозы забойствам, наўмыснае прычыненне лёгкай шкоды здароўю і згоны аўтамабіляў. Большасць злачынстваў яна здзейсніла ў нецвярозым стане.
Раней «Важныя гісторыі» распавялі, што Мінабароны Расіі вярбуе на вайну ва Украіне жанчын-зняволеных. Тады гаворка ішла аб жаночай папраўчай калоніі № 2 у Ленінградскай вобласці. У красавіку выданне знайшло яшчэ чатыры калоніі, у якіх зняволеных жанчын вербавалі на вайну ва Украіне — у Іванаўскай і Уладзімірскай абласцях, у Пермскім краі і Мардовіі. Раней пра такую вярбоўку паведамляў Генштаб УСУ.
Каментары