Арцём Жога, які папрасіў Пуціна балатавацца на новы тэрмін, прызначаны ў Раду бяспекі Расіі
Узвышэнне былога камандзіра данецкіх сепаратыстаў працягваецца.
Экс-камандзір падраздзялення данецкіх прарасійскіх сепаратыстаў «Спарта» Арцём Жога ўключаны ў Раду бяспекі Расіі. Такое рашэнне прыняў Уладзімір Пуцін.
Пра ўзвышэнне былога данецкага сепаратыста «Наша Ніва» ўжо расказвала. У снежні 2023 года менавіта Жога на сустрэчы з Пуціным спытаўся, ці збіраецца той вылучацца на новы тэрмін. Пуцін адказаў станоўча. Праз год Жога атрымаў вялікае прызначэнне — ён стаў паўнамоцным прадстаўніком прэзідэнта ў стратэгічна важнай Уральскай федэральнай акрузе.
Жога быў актыўным удзельнікам прарасійскага сепаратысцкага руху на Данбасе, разам з сынам Уладзімірам ён з 2014 года ваяваў у падраздзяленні «Спарта» Матаролы.
Пасля забойства камандзіра батальён узначаліў Уладзімір Жога, які ўжо ў пачатку поўнамаштабнай вайны таксама быў забіты пад Аўдзееўкай. Тады падраздзяленнем стаў камандаваць ужо сам Арцём Жога. Праваабаронцы і ўкраінскія ўлады абвінавачваюць «Спарту» ў ваенных злачынствах, у тым ліку ў пакараннях смерцю ваеннапалонных.
У 2023-м Жога ўпершыню сустрэўся з Пуціным, які асабіста перадаў яму зорку Героя Расеі, якой пасмяротна ўзнагародзілі Уладзіміра Жогу. Пасля гэтага Жога-бацька ўвайшоў у генеральную раду «Адзінай Расіі» і ўзначаліў Народную раду «ДНР».
Каментары