«Калі будзем здымаць санкцыі з Беларусі і Расіі, то ад гэтага ў NATO або ЗША праблем не зменшыцца, а толькі павялічыцца», — кажа прэм'ер Гінтаўтас Палуцкас.
У адказ на інфармацыю сусветных СМІ аб жаданні ЗША змякчыць санкцыі супраць Беларусі і аднавіць экспарт калійных угнаенняў з гэтай краіны, прэм'ер-міністр Гінтаўтас Палуцкас заяўляе, што паспрабуе растлумачыць сваім саюзнікам, што гэта было б вялікай памылкай, піша Delfi.lt.
«Сёння беларускі рэжым, з-за падаражэння лагістыкі і санкцый, не атрымлівае непасрэдна ў бюджэт амаль паўмільярда даляраў ЗША ад экспарту ўгнаенняў. Гэта значная сума, і, калі мы вернем яе ў бюджэт, не думаю, што Літве ці нашаму рэгіёну ад гэтага стане лепш», — сказаў Палуцкас.
На думку прэм'ер-міністра, новая адміністрацыя ЗША павінна ўлічваць не толькі патрэбу ў калійных угнаеннях, але і пагрозы бяспекі, якія ўзнікнуць у выпадку падтрымкі эканомік варожых краін.
«Калі будзем здымаць санкцыі з Беларусі і Расіі, то ад гэтага ў NATO або ЗША праблем не зменшыцца, а толькі павялічыцца. Пакуль у нас ёсць NATO ў якасці галоўнага абарончага парасоніка, я не чуў, каб ЗША абяцалі выйсці з яго, то ствараць сабе дадатковыя праблемы, фінансуючы тыя рэжымы, якія хочуць ваяваць з краінамі NATO, дакладна няма ніякага сэнсу», — растлумачыў ён.
На думку Палуцкаса, у ЕС могуць узнікнуць праблемы пры прыняцці пастановы аб падаўжэнні санкцый супраць Расіі, бо Венгрыя ўжо выказала сваю нязгоду. Аднак прэм'ер-міністр спадзяецца, што лідарам ЕС удасца знайсці спосабы абысці пазіцыю Венгрыі.
«На дадзены момант перад самімі лідарамі Еўрасаюза стаіць немалая галаваломка, як адаптаваць інструменты прыняцця рашэнняў, каб выключыць гэтую шкоднасную пазіцыю з працэсу прыняцця рашэнняў. Ці будзе гэта прыпыненне права голасу, ці будзе гэта рабіцца кваліфікаванай большасцю, ці ўгаворам не ўдзельнічаць у галасаванні, ці кампенсацыйнымі мерамі», — разважаў Палуцкас.
Цяпер чытаюць
Пра што маўчыць Аляксей Францкевіч, якому Польшча закрыла ўезд на 10 гадоў67
Каментары