Nutella падаражэе? Цэны на фундук падскочылі на 30% з-за неўраджаю
З-за вясновых замаразкаў цэны на фундук у Турцыі з красавіка па ліпень выраслі на 20-30%. Праблема ў тым, што на гэтую краіну прыпадае каля 65% сусветнай вытворчасці фундука.
Значная частка фундука выкарыстоўваецца ў вытворчасці шакаладнай пасты і іншых прысмакаў, піша Office Life са спасылкай на Bloomberg.
Найбуйнейшыя экспарцёры Турцыі ацэньваюць зніжэнне вытворчасці ў бягучым годзе як мінімум на 20%, да 609 тысяч тон. Ёсць ацэнкі, што з-за спекулятыўнага попыту цэны на сыравіну да наступнага года могуць вырасці ў некалькі разоў.
Альтэрнатыўныя пастаўкі з Італіі, ЗША і Чылі не змогуць цалкам кампенсаваць зніжэнне ўраджаю ў Турцыі, паколькі ў гэтых краінах пераважаюць дробныя вытворцы з невялікімі аб'ёмамі, пракаментавалі ў міжнародным Савеце па арэхах і сухафруктах.
Заклапочанасць сітуацыяй ужо выказала італьянская кампанія Ferrero SpA. Яна з'яўляецца найбуйнейшым у свеце пакупніком фундука (прыкладна чвэрць турэцкага экспарту) і вырабляе пасту Nutella, у якой 13% ад усіх інгрэдыентаў складае фундук.
Вытворцам кандытарскіх вырабаў і шакаладу ў апошні час не пазайздросціш. Увесь мінулы год у свеце раслі цэны на какава-бабы.
Каментары