Іх удзельнікі патрабавалі ад беларускіх уладаў не прымаць Бакіева ў выпадку яго прыбыцця на тэрыторыю Беларусі.
19 красавіка каля будынка пасольства Беларусі ў Кыргызстане прайшлі пікеты. Паводле інфармацыі мясцовых СМІ, іх удзельнікі патрабавалі ад беларускіх уладаў не прымаць Курманбека Бакіева і ў выпадку яго прыбыцця на тэрыторыю Беларусі — выдаць новым уладам Кыргызстана.
Начальнік упраўлення інфармацыі — прэс-сакратар Міністэрства замежных спраў Беларусі Андрэй Савіных пацвердзіў БелаПАН інфармацыю аб правядзенні пікетаў. «Было некалькі пікетаў каля беларускага пасольства ў Бішкеку. Яны былі кароткачасовыя і небяспекі для супрацоўнікаў пасольства не ўяўлялі», — сказаў прэс-сакратар МЗС.
Разам з тым, ён не стаў каментаваць мэты правядзення акцый.
Савіных таксама заявіў, што МЗС Беларусі «не мае ніякай інфармацыі аб прылёце Бакіева ў Мінск».
Сёння на брыфінгу ў Астане афіцыйны прадстаўнік МЗС Казахстана Аскар Абдрахманаў паведаміў, што Курманбек Бакіеў, які некалькі дзён знаходзіўся на тэрыторыі Казахстана, пакінуў краіну. Куды менавіта накіраваўся былы лідэр Кыргызстана, невядома.
Чуткі пра тое, што Бакіеў вылецеў з Казахстана і можа знаходзіцца ў Беларусі, актыўна мусіраваліся 16—17 красавіка. Тады афіцыйны Мінск абверг гэтую інфармацыю.
18 красавіка Аляксандр Лукашэнка заявіў пра гатоўнасць прыняць Курманбека Бакіева з сям'ёй у Беларусі.
«Калі прэзідэнту Кыргызстана патрэбна будзе падтрымка ў гэтую цяжкую хвіліну для яго сям'і <...>, яна будзе аказана ўсялякая ў Беларусі. Калі ён захоча прыехаць у Беларусь — хоць сёння, хоць заўтра, хоць паслязаўтра — мы гатовы прыняць яго тут. Я ведаю, што цяпер уздымецца выццё ва ўсіх сродках масавай інфармацыі, але я паўтараю — гэта маё асабістае рашэнне як кіраўніка дзяржавы. Я маю права на гэтае рашэнне. Няхай мяне асуджаюць, не асуджаюць, але здраджваць людзям — гэта самае ганебнае, што можа быць у гэтым свеце», — заявіў Лукашэнка журналістам падчас наведвання касцёла Найсвяцейшай Панны Марыі ў Мінску.
Між тым, 17 красавіка намеснік старшыні ўрада Кыргызстана Азімбек Бекназараў заявіў: новыя ўлады Кыргызстана будуць мець «сур'ёзныя пытанні» да любой з краін СНД, якая дасць прыстанішча Курманбеку Бакіеву. На пытанне пра верагоднасць знаходжання Бакіева ў Мінску Бекназараў адказаў, што «Лукашэнка не пойдзе на гэта», бо паміж Беларуссю і Кыргызстанам «існуе пагадненне аб экстрадыцыі злачынцаў». Бекназараў нагадаў, што ў дачыненні да Бакіева распачата крымінальная справа «па фактах масавых забойстваў і узурпацыі ўлады».
Цяпер чытаюць
У дзень, калі памілавалі палітвязня Дароніна, ягонай жонцы прысудзілі 8,5 гадоў калоніі за ўдзел у дваровым чаце5
Каментары