Гэта лаўка ў гонар даследчыцы гісторыі архітэктуры Ан-Мары Занковіч.
Ан-Мары была найстарэйшай дачкой беларускага хірурга ў ЗША Анатоля Занковіча, што сёлета адзначыў свой стогадовы юбілей, і сястрой пісьменніцы Ніны Занковіч, піша ў сваім фэйсбуку даследчыца беларускай гісторыі Наталля Гардзіенка.
Яна нарадзілася 27 мая 1958 г. у Эванстане (Ілінойс), закончыла Сміт-каледж у 1976 г. Пазней атрымала ступень доктара гісторыі мастацтва ў Інстытуце мастацтва Нью-Ёрскага ўніверсітэта. Яе дысертацыя была выдадзеная кнігай ужо пасля яе смерці («The Church of Saint-Eustache in the Early French Renaissance (Architectura Moderna)» (2016)).
Ан-Мары Занковіч памерла ад раку 19 мая 2005 г. Яе сыход быў шокам для ўсёй сям’і. Сястра Ніна дзеля пераадолення гэтай траўмы стала пісаць кнігі (першая кніга «Талстой і фіялетавае крэсла», выйшла ў розных мовах, у тым ліку і ў беларускай у 2021).
Сям’я і сябры заснавалі ў гонар Ан-Мары адмысловы фонд у падтрымку даследаванняў у галіне гісторыі архітэктуры ў Інстытуце мастацтва Нью-Ёрскага ўніверсітэта. А ў Conservatory Garden у Цэнтральным парку з'явілася лаўка яе імя.
Цяпер побач таксама шыльда ў гонар яе маці Тыльды і мужа Ніны Джэка.
Каментары