«Прыбраць Пуціна — усё будзе па-іншаму». Лукашэнка расказаў, як папярэджваў прэзідэнта Расіі пра небяспеку замаху
Аляксандр Лукашэнка расказаў, як папярэджваў Уладзіміра Пуціна пра небяспеку замаху. Пра гэта ён узгадаў у размове з журналістамі на «Гарызонце» 31 снежня, паведамляе БелТА.
«Сёння ўначы я падумаў пра тое, што… Успомніў размову з Пуціным. Здаецца, гэта было перад БРІКС у Паўднёвай Афрыцы. Чамаданы збірае. Я кажу: «Ты куды?» — «Ды ты што, не ведаеш? У нас жа БРІКС» (адказаў Пуцін.)». Кажу: «Ты што, сабраўся туды ляцець?» Такая сяброўская, братэрская размова. Старэйшаму брату: «Ты сабраўся туды ляцець?» — «Ну вось, прасілі, мяне ж там чакаюць».
Я кажу: «Ты што! Вайна ідзе!» — «Ну, яны ж не такія ўжо шалёныя, не настолькі шалёныя». Я кажу: «І ты што, лічыш, што там усе ў здаровым розуме? Няма чаго туды ехаць!»
Тады паляцеў Лаўроў. Магчыма, не таму, што я націснуў. Але я выказаў яму сваё меркаванне», — падзяліўся падрабязнасцямі Аляксандр Лукашэнка.
«Але гэта не была проста такая, ведаеш, вясковая размова. Наша разведка (малайцы яны, апошнім часам працуюць нядрэнна) інфармавала нас. На ўзроўні там размоў, плётак з Захаду, што рыхтуецца тэрарыстычны акт супраць прэзідэнта Расіі. І я яму часта кажу: «Ну вайна ідзе, ну не трэба туды лётаць. Калі камусьці трэба — яны да цябе прыляцяць», — сказаў ён. — Вось ён запрасіў нас у Пецярбург. Яго найбліжэйшыя сябры прыляцелі туды. Прыляцяць і іншыя. І Сі Цзіньпін прыляціць, і з Ірана, з іншых краін прыляцяць людзі. Але трэба як-небудзь асцярожней. Гэтым людзям давяраць нельга. Але, кажу, табе (Уладзіміру Пуціну) відаць лепш, ты ў гэтай сферы працаваў, гэта ваша сфера (чэкісцкая), табе відаць лепш. Вось такая нейкая была не бесклапотнасць, а страта пэўнай пільнасці».
«І я сёння падумаў пра тое, наколькі я меў рацыю, калі папярэджваў яго і засцерагаў. Зразумела, што ўсе яны на Захадзе разумеюць: прыбраць Пуціна — усё будзе па-іншаму. Да гэтага трэба ставіцца сур’ёзна. Я пра гэта распавядаю ўпершыню сёння, таму што нельга быць бесклапотным. Яны падманвалі, і гэта ён прызнае, пастаянна», — сказаў Лукашэнка.
Аляксандр Лукашэнка ў гэтай сувязі нагадаў пра сітуацыю ў самым пачатку супрацьстаяння ў 2022 годзе. «Першыя месяцы і нават тыдні, калі расійскія войскі былі ў Кіеве.
І тады каталікі, яўрэі — былі яны, два гэтыя магутныя кланы, наперадзе: «Ох, трэба заканчваць вайну…» І Пуцін кажа: «Так, трэба заканчваць». Па мордах надавалі адзін аднаму, давайце спынімся.
— «Так, Уладзімір Уладзіміравіч, ну трэба вывесці вось войскі — і ўсё, мы памірыліся, мы спыніліся» (запэўнівалі Пуціна). Спыніліся? Не спыніліся. То бок ім верыць нельга», — прывёў прыклад Лукашэнка.
Цяпер чытаюць
Галоўная рэдактарка гомельскай раёнкі пакаялася за тое, што абвінаваціла гурт «Дразды»7
Каментары