У Полацку ліквідавалі стогадовую друкарню, названую ў гонар Францішка Скарыны
У апошні дзень 2025 года ў Полацку ліквідавалі друкарню, якая называлася ў гонар славутага земляка — Полацкае камунальнае ўнітарнае паліграфічнае прадпрыемства «Спадчына Францыска Скарыны». Дакументы на ліквідацыю друкарні былі пададзеныя 10 сакавіка 2025 года, піша Беларуская асацыяцыя журналістаў.
Фота: tipografia-polotsk-vitebsk.ibiz.by
Цяпер на сайце кансалтынгавага прадпрыемства «Віцебскі абласны цэнтр маркетынгу» прадаюць усю маёмасць «Спадчыны Францыска Скарыны», у тым ліку тэхніку, мэблю і прадметы інтэр’еру.
Друкарня вырабляла бланкі, календары, плакаты, рэкламныя праспекты, а таксама больш за дзесяць гадоў была вядомай тым, што рабіла этыкеткі і ўпакоўку для харчовай прамысловасці.
У снежні 2018 года друкарня адзначыла сваё 100‑годдзе і ў той час дзяржаўныя СМІ Беларусі называлі яе «ўзорным» прадпрыемствам.
Як пісалі дзяржаўныя сродкі масавай інфармацыі, «у далёкім 1918 годзе маладая савецкая рэспубліка прыняла рашэнне аб стварэнні дзяржаўнай друкарні шляхам нацыяналізацыі і аб’яднання трох прыватных друкарняў. Нягледзячы на цяжкія ваенныя і пасляваенныя гады, раскіданне Савецкага Саюза і іншыя гістарычныя падзеі, друкарня ні на дзень не спыняла сваю працу».
Але і гэтаму прыйшоў канец, 31 снежня 2025 года стаў апошнім днём існавання полацкай друкарні.
Раней у тым жа 2025 годзе з прычыны фінансавых праблем на мяжы ліквідацыі была і глыбоцкая друкарня, якая месціцца ў будынку побач з рэдакцыяй раённай газеты «Веснік Глыбоччыны». Яна ў асноўным друкуе канцылярскія тавары з дзяржаўнай сімволікай, але часам выконвае і прыватныя замовы ад мясцовых паэтаў, пісьменнікаў ды іншых творчых асоб, вырабляе для іх кнігі і брашуры.
На працягу года гэтую друкарню фінансава ліхаманіла. Яна неаднаразова трапляла ў «чорны спіс» завінавачаных, але хутка выходзіла з яго. На сайце Міністэрства падаткаў і збораў апошнюю запазычанасць глыбоцкая друкарня закрыла 13 студзеня 2026 года.
Адзіны вядомы партрэт Васіля Цяпінскага аказаўся выявай французскага архітэктара
На гарышчы пад Стоўбцамі знайшлі артэфакты, якія сяляне 60 гадоў таму схавалі ад савецкай улады
На будынку віленскай друкарні Скарыны з'явіўся чарговы правакацыйны надпіс ФОТА
Беларусаў у Польшчы затрымалі за працу ў падпольных друкарнях
Каментары