Чалавекам, якога застрэлілі ля рэзідэнцыі Трампа ў Фларыдзе, аказаўся хлопец, які захапляўся маляваннем палёў для гольфа
Забітым каля рэзідэнцыі Трампа ў Мар-а-Лага аказаўся 21‑гадовы Осцін Марцін з Паўночнай Караліны. Ён працаваў у гольф-клубе і маляваў пейзажы, піша New York Post.
Прычым ён захапляўся маляваннем пейзажаў гольф-палёў.
У яго Instagram апублікавана серыя акварэляў і чорна-белых накідаў, большасць з якіх, відаць, адлюстроўваюць гольф-клуб Quail Ridge, размешчаны прыкладна за 15—20 міль на поўнач ад яго дома ў Камеране. Апошні допіс быў выкладзены тры дні таму.
Стрыечны брат Марціна апісаў хлопца як «ціхага чалавека, які баяўся зброі», і назваў яго выхадцам з сям’і перакананых прыхільнікаў Трампа.
Паводле яго слоў, Марцін працаваў у мясцовым гольф-клубе і з кожнага заробку накіроўваў грошы на дабрачыннасць.
Сям’я Марціна, мяркуючы па пастах у сацыяльных сетках, шукала яго з вечара суботы. Яго маці Меліса Марцін на сваёй старонцы паведаміла пра знікненне сына.
Учора паведамлялася, што мужчына ва ўзросце каля 20 гадоў быў застрэлены пасля таго, як ён, як сцвярджаецца, парушыў ахоўны перыметр маёнтка прэзідэнта Дональда Трампа Мар-а-Лага ў Палм-Біч.
Каментары