У андскіх лясах ідэнтыфікавалі рэдкае дрэва. Яно аказалася сваяком бульбы і памідораў
Навукоўцы адкрылі новы род дрэў, які аказаўся сваяком памідораў і бульбы. Гаворка ідзе пра рэдкае дрэва з андскіх лясоў, якое раней не мела дакладнай навуковай класіфікацыі, піша Revistaoeste.com.
Даследчыкі вывучылі як гербарныя ўзоры, так і свежыя расліны, і ў выніку прыйшлі да высновы, што гэта асобны род у сямействе паслёнавых. Яму далі назву Daturodendron, што можна перакласці як «дрэвападобны сваяк дурнап'яну». Раней больш за 20 гадоў гэтае дрэва фіксавалі ў Калумбіі і Перу, але не маглі дакладна аднесці да пэўнай групы.
У адрозненне ад многіх сваіх «сваякоў», гэта не куст, а паўнавартаснае дрэва з адным ствалом, якое можа вырастаць да 20 метраў. Ягоныя кветкі накіраваныя ўверх, а плады застаюцца закрытымі і драўнянымі — гэта таксама адрознівае яго ад іншых паслёнавых.
Расце дрэва ў вільготных горных лясах на вышыні ад 1300 да 2100 метраў. Вядомыя толькі некалькі ізаляваных папуляцый, таму кожнае месца яго росту мае вялікае значэнне для навукі і аховы прыроды.
У лісці гэтага дрэва знойдзены трапанавыя алкалоіды — рэчывы, якія могуць уплываць на нервовую сістэму. Яны выкарыстоўваюцца ў медыцыне, але ў прыродзе служаць расліне для абароны ад жывёл.
Генетычныя даследаванні паказалі, што гэтае дрэва займае асаблівае месца ў эвалюцыі сваёй групы і, магчыма, захоўвае старажытныя рысы, страчаныя іншымі відамі.
Пакуль што від лічыцца недастаткова вывучаным, бо пра яго вядома вельмі мала. Навукоўцы папярэджваюць, што ён можа аказацца пад пагрозай знікнення з-за блізкасці дарог і населеных пунктаў.
Каментары