Прэс-сакратар МЗС: Мы спадзяемся, што італьянскі бок зробіць усё магчымае, каб Віка Мароз вярнулася на радзіму
На жаль, няма 100-працэнтнай упэўненасьці, што дзяўчынка жывая і здаровая
Пакуль у справе 10-гадовай Вікі Мароз, выхаванкі Вялейскага дому-інтэрнату няма новых зьвестак. Пра гэта карэспандэнту «НН» заявіў прэс-сакратар Міністэрства замежных спраў Беларусі Андрэй Папоў.
«Мы прадпрымаем усе захады, каб вярнуць дзяўчынку на радзіму. У прыватнасьці, быў дасланы ў Інтэрпол запыт ад Міністэрства юстыцыі, робяцца іншыя крокі». У Міністэрстве замежных спраў спадзяюцца, што італьянскі бок зробіць усё магчымае, каб вярнуць 10-гадовую Віку ў Беларусь.
Пытаньне пра Віку Мароз было ўзьнятае ў чацьвер на брыфінгу ў Міністэрстве замежных спраў. Журналістаў, сярод іншага, цікавіла, ці здаворая дзяўчынка, і чаму італьянская прэса называе яе Машай (апошняе пытаньне ІТАР-ТАСС), у такім выпадку ці не вядзецца гаворка пра дзьвюх розных дзяўчынак?
«Гаворка вядзецца пра адну і тую дзяўчынку, – зазначыў на брыфінгу А. Папоў. - Рэч у тым, што пры асьвятленьні судовага працэсу ў італьянскіх СМІ з этычных меркаваньняў было прынята рашэньне называць дзяўчынку пад псэўданімам, а не пад ейным сапраўдны імем».
На жаль, няма 100-працэнтнай упэўненасьці, што дзяўчынка жывая і здаровая, апроч вусных запэўніваньняў італьянскіх уладаў.
Нагадаем, што Віка Мароз знаходзілася ў гарадку Кагалета (вобласьць Лігурыя) на адпачынку. 8 верасьня яна мусіла вярнуцца на радзіму, аднак не зьявілася ў аэрапорце. Высьветлілася, што яе не аддала сям’я Анны Марыі Барначын і Алесандра Гвіста, якія заявілі, што ня вернуць Віку, паколькі ў Вялейскім доме-інтэрнаце над дзяўчынкай чыніўся маральны і фізычны гвалт.
У Вялейцы адкідаюць гэтыя абвінавачаньні. Да пошукаў Вікі Мароз была падключана італьянская паліцыя, на вяртаньні настойвае ўрад гэтай краіны.
Галоўная праблема ў тым, што канфлікт ставіць пад пагрозу аздараўленьне беларускіх дзяцей за мяжой, якіх штогод у той жа Італіі адпачывае некалькі тысячаў.
Цяпер чытаюць
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку2424
Каментары