Сабака моцна пагрыз буйную купюру, але яе ўсё адно прынялі. У якіх выпадках не варта адчайвацца?
Сабака моцна пагрыз банкноту наміналам 100 беларускіх рублёў, адарваўшы ад яе частку, але ўладальнік змог абмяняць пашкоджаныя грошы ў «Беларусбанку» і атрымаў новую купюру. Відэа з гэтай гісторыяй распаўсюдзілася ў тыктоку. Аказваецца, моцна пашкоджаныя беларускія грошы ў пэўных выпадках сапраўды можна абмяняць у банку, тлумачыць Myfin.by.
Знешні выгляд банкноты сам па сабе не вызначае, ці можна яе абмяняць. Банкаўскія работнікі правяраюць, якая частка купюры захавалася, ці можна ўстанавіць, што ўсе фрагменты належаць адной банкноце, і ці няма сумненняў у яе сапраўднасці.
Паводле дзейных правіл, пашкоджаную беларускую банкноту можна абмяняць, калі захавалася не менш за 55% яе першапачатковай плошчы. Таму нават купюра, якая выглядае вельмі моцна пашкоджанай, можа заставацца прыдатнай для абмену.
Правілы прадугледжваюць некалькі відаў пашкоджанняў, пры якіх банкнота можа быць прынятая. Напрыклад, калі яна страціла частку плошчы, але захавала не менш за 55%, разарвалася на часткі, якія можна ідэнтыфікаваць як часткі адной купюры, мае надрывы, дзіркі або пашкоджаныя краі. Таксама можна абмяняць банкноты, пашкоджаныя вадой, агнём ці іншым уздзеяннем, калі па іх асноўных прыкметах можна вызначыць сапраўднасць. Канчатковае рашэнне прымае банк пасля праверкі канкрэтнай банкноты.
Пры гэтым пашкоджаную купюру нельга ператварыць у дзве. Калі, напрыклад, банкноту наміналам 20 рублёў разарваць напалову і прынесці абедзве часткі ў банк, супрацоўнікі правераць, ці сапраўды яны належаць адной банкноце. Калі ўсе ўмовы для абмену выкананыя, уладальнік атрымае адну новую купюру наміналам 20 рублёў, а не дзве. Сам факт фізічнага пашкоджання не павялічвае вартасць грошай.
Для замежнай валюты дзейнічаюць іншыя правілы. Нельга аўтаматычна лічыць, што пашкоджаны даляр ці еўра банк абавязаны абмяняць на новую банкноту гэтак жа сама, як беларускія рублі. Прыём і абмен пашкоджанай замежнай валюты залежыць ад правіл канкрэтнага банка і патрабаванняў банка-эмітэнта. У некаторых выпадках банк можа прыняць такую купюру для дадатковай экспертызы або інкаса, прычым гэтая паслуга можа быць платнай.
Таму моцна пашкоджаныя грошы не варта адразу выкідаць. Калі купюру пагрызла жывёліна, яе выпадкова разарвалі, яна прайшла праз пральную машыну ці была пашкоджаная іншым чынам, лепш захаваць усе часткі і паказаць іх у банку. Магчыма, банкноту яшчэ можна будзе абмяняць.
Беларус прывёз з Вялікабрытаніі дахаты падробленыя фунты
Работніцу банка з Гомеля, якая падмяняла беларускія грошы на сувенірныя еўра, адправілі ў калонію
Беларуская сям'я 10 гадоў не магла знайсці схаваную заначку. Грошы ўвесь гэты час ляжалі ў печы
У івацэвіцкім банку адмовіліся абмяняць даляры, атрыманыя пасля продажу хаты
Цяпер чытаюць
Хто такая Алеся Пархоменка з Кіпра, якая развязала беларуска-беларускую вайну93
Хто такая Алеся Пархоменка з Кіпра, якая развязала беларуска-беларускую вайну
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1515
Каментары