Бізнэсовец Андрэй Бірукоў, канструктар Андрэй Гінзбург, дызайнер Андрэй Трафімчук — усе яны знайшлі сябе за мяжой.
Шматмільённы аўтамабільны праект усходніх суседзяў «Ё-мабіль» так ці іначай закране беларускі рынак.
Агульная мытная прастора дазволіць прывозіць «Ё-мабілі» ў нашу краіну без усялякіх праблем. Але ж Беларусь хоча яшчэ і збіраць машыны ў сябе! Год да пачатку камерцыйнай вытворчасці — самы час, каб пазнаёміцца з «Ё-мабілем» бліжэй і знайсці яго беларускія карані.
Электрастанцыя на колах
Што ж такое «Ё-мабіль»? Гэта гібрыдны аўтамабіль, які выкарыстоўвае бензін і газ для выдзялення энергіі. Таму «Ё-мабіль» можна назваць міні-электрастанцыяй. Энергія ў ім будзе назапашвацца і захоўвацца не ў акумулятарных батарэях (як звычайна), а ў суперкандэнсатарных элементах, якія ніколі раней не ўжываліся ў аўтавытворчасці. Дзякуючы гэтаму
расход паліва складзе ўсяго 3,5 л/100 км.
Гісторыя аўтамабіля пачалася летась, калі яго стварэнне анансавалі расійская інвестыцыйная група АНЭКСІМ мільярдэра Міхаіла Прохарава і беларуска-расійская кампанія «Яравіт Мотарс» беларуса Андрэя Бірукова. Яны і стварылі ААТ «Гарадскі аўтамабіль», пазней перайменаваны ў «Ё-Аўто».
Беларуская назва…
Вось тут самы час пачаць гаворку пра беларускую сутнасць праекта. Па-першае,
назву для «Ё-мабіля» прыдумаў беларускі дызайнер Уладзімір Цэслер.Яму ўдалося пераканаць Прохарава, што літара «Ё» з’яўляецца ўнікальнай. Па-другое, менавіта Цэслер прапанаваў двухколерную афарбоўку аўтамабіляў, абраўшы адным з колераў «слановую косць».
…і беларускія стваральнікі
Хто ж такі Андрэй Бірукоў? Генеральны дырэктар «Ё-Аўто», які ажыццяўляе агульнае кіраўніцтва праектам, вырас і пачынаў свой бізнэс у Беларусі. Пераехаўшы ў суседнюю Расію, ён захапіў з сабой і групу аднадумцаў — беларускіх інжынераў, якія не знайшлі для сябе належнай працы ў нашай краіне.
Сярод іх фактычны стваральнік — галоўны канструктар новага аўтамабіля Андрэй Гінзбург — і шэф-дызайнер праекта Андрэй Трафімчук. Праўда, і першы, і другі не здабылі і адсотка ад той славы, якая дасталася спонсару праекта Міхаілу Прохараву.
Можа, засталіся б яны на радзіме, дык у Беларусі ствараўся б праект «Ў-мабіль»…
Тэрмін гатоўнасці — год
У канцы 2012 года ў продажы павінны з’явіцца тры мадэлі «Ё-мабіля». Гэта мікравэн, красовер і фургон. Максімальная хуткасць усіх машын — 120 км/г. Першы завод па выпуску аўтамабіляў будзе пабудаваны пад Пецярбургам у індустрыйным парку «Мар’іна». Там змогуць рабіць 45 тысяч машын штогод, але гэтага будзе відавочна недастаткова. Запушчаны ў маі сайт, на якім можна было пакінуць заяўку на аўтамабіль, проста ламіўся ад папулярнасці. У першы ж дзень такое жаданне выказалі 50 тысяч чалавек — больш чым гадавы аб’ём выпуску!
За тыдзень колькасць ахвотных дарасла да 100 тысяч.У сувязі з такой папулярнасцю праекту Беларусь выказала жаданне адкрыць у сябе паралельны выпуск аўтамабіля. Беларускі дзяржкамітэт па навуцы і тэхналогіях накіраваў у Расію прапанову стварыць беларускае аддзяленне па выпуску ё-мабіляў. Адказу ад Прохарава пакуль не было.
Вядро дзёгцю
Сярод акіяну расійскага аптымізму гучаць і галасы скептыкаў. Фантастычны праект не бачыцца ім рэальна ажыццяўляльным. І падставы для крытыкі ёсць.
Адсутнасць досведу ў распрацоўшчыкаў, дзіўныя канструктарскія рашэнні, якія не дазваляюць пралічыць бяспеку кіроўцы падчас аварыі, рызыка кароткага замыкання «электрастанцыі на колах» прымушаюць задумацца, чаго ў праекце больш — сапраўднай працы ці піяру велічы расійскага аўтарынку.Адказы на пастаўленыя пытанні будуць дадзеныя ў 2012-м, калі першыя энтузіясты заплацяць $12--15 тысяч і сядуць за стырно беларускай ідэі, выкананай за расійскія грошы.
Цяпер чытаюць
Памятаеце Асоль Слівец? Жыццё фрыстайлісткі змянілася да непазнавальнасці, цяпер яна Абігаль3
Каментары