1,7% склаў у красавіку рост спажывецкіх цэн у Беларусі. З пачатку года цэны павялічыліся на 6,8%, паведамляе Нацыянальны статыстычны камітэт. У студзені цэны ўзраслі на 1,9%, у лютым — на 1,5%, у сакавіку — таксама на 1,5%.
Харчаванне ў красавіку падаражэла на 1,8% (за чатыры месяцы — на 6,9%), у тым ліку алкаголь — на 5,6%, агародніна — на 5%, яйкі — на 2%, мяса і птушка — на 1,9%, малако і малочныя прадукты, хлеб і хлебабулачныя вырабы — на 1,5%.
Цэны на нехарчовыя тавары павялічыліся на 1,2% (5,3%). У лідарах — бензін (5,5%), веласіпеды і матацыклы (2,3%), медыкаменты (2,1%), будматэрыялы (1,5%).
Тарыфы на платныя паслугі насельніцтву павысіліся на 2,5% (9,9%). Найбольш за ўсё падаражэлі праезд у аўтамабільным транспарце прыгарадных зносінаў (20%), у гарадскім транспарце (17,4%), тэхабслугоўванне жылых памяшканняў (12,9%), санаторна-аздараўленчыя паслугі (6,7%).
Цэны вытворцаў прамысловай прадукцыі ўзраслі за месяц на 2,2%, з пачатку года — на 7,6%, сельгаспрадукцыі — адпаведна на 1,2% і 15,3%, кошт будаўніча-мантажных работ — на 4,6% і 12,9%.
Урад разлічвае ўтрымаць гадавую інфляцыю на ўзроўні 19—22%. У 2011 годзе цэны ўзраслі на 108,7%.
Каментары