Канчаткова: Мілінкевіч не зарэгістраваны кандыдатам у дэпутаты
ЦВК зняў прэтэнзіі па яго дэкларацыях, але пацвердзіў, што подпісы — несапраўдныя.
ЦВК зняў прэтэнзіі па яго дэкларацыі і па папярэджаннях ініцыятыўнай групе, але пацвердзіў, што 26,5% ад агульнай колькасці правераных подпісаў — несапраўдныя.
Аляксандра Мілінкевіча на разглядзе скаргі ў Цэнтравыбаркаме прадстаўляў сябра яго ініцыятыўнай групы Юрый Меляшкевіч. У сваім выступе ён падкрэсліў, што лічыць адмову ў рэгістрацыі Мілінкевіча кандыдатам у дэпутаты палітычна матываванай.
«Наконт подпісаў, сабраных некарэктна, хачу сказаць: лічбы, якія падаюцца ў рашэнні акруговай камісіі, абсалютна нелагічныя. Усе факты, якія, быццам бы, выказваюцца, не пацвярджаюцца сканамі падпісных аркушаў, якімі мы маем,― заявіў Меляшкевіч. ― Зямля, пазначаная ў рашэнні акруговай камісіі, як незадэклараваная Аляксандрам Мілінкевічам, не належыць яму, а ўсяго толькі знаходзіцца ў пажыццёвым валоданні. Зямля гэтая з’яўляецца ўласнасцю Рэспублікі Беларусь».
Ініцыятыўная група Мілінкевіча падала ў акруговую камісію 2452 подпісы. Эксперт ЦВК заявіла, што 66 з іх не падлягаюць уліку, бо ў адным з падпісных аркушаў адсутнічае ўказанне на асобу, за якую збіраюцца подпісы, а 51 -пастаўленыя грамадзянамі, якія не пражываюць на тэрыторыі Уручскай выбарчай акругі № 109. Засталося 2386 подпісаў — удвая больш, чым трэба.
Гэта 26,5% ад правераных подпісаў, хаця для таго, каб зняць прэтэндэнта з выбарчай кампаніі, дастаткова 15%. Дадатковая праверка выявіла яшчэ 45 несапраўдных подпісаў. Прычым 12 з гэтых подпісаў былі на адным аркушы, які сябры ініцыятыўнай групы Мілінкевіча забылі заверыць.Але 53 з 200 подпісаў, абраных для першай праверкі, на розных падставах прызнаныя несапраўднымі.
Сябра ЦВК з правам дарадчага голасу Ігар Лялькоў лічыць не вартымі даверу вынікі крыміналістычнай экспертызы, пры дапамозе якой акруговая камісія даказвае несапраўднасць подпісаў, пададзеных Мілінкевічам.
Мікалай Лазавік часткова падтрымлівае Лялькова. Ён прапануе зняць з Мілінкевіча прэтэнзіі па памылках у дэкларацыі і па папярэджаннях яго ініцыятыўнай групе, але ўсё ж не рэгістраваць яго праз вялікую колькасць несапраўдных подпісаў.
ЦВК галасуе і адмаўляе Аляксандра Мілінкевічу ў задавальненні скаргі. Ён не зарэгістраваны кандыдатам у дэпутаты.
Чытаць далей: http://euroradio.fm/report/alyaksandr-milinkevich-ne-zaregistravany-kandydatam-
Каментары