Тацьцяну Севярынец — маці палітвязьня Паўла Севярынца — звальняюць з працы ў сярэдняй школе № 40 Віцебска, дзе яна цягам шматлікіх гадоў выкладала расейскую мову і літаратуру.
Таццяну Севярынец — маці палітвязня Паўла Севярынца — звальняюць з працы ў сярэдняй школе №40 г.Віцебска, дзе яна цягам шматлікіх гадоў выкладала рускую мову і літаратуру.
Начальнік Першамайскага раённага аддзела адукацыі г.Віцебска Уладзімір Шлома заяўляе, што жанчына самавольна сышла ў адпачынак за свой рахунак, хоць напярэдадні сам дазволіў ёй не выходзіць на працу цягам некалькіх дзён.
Як распавяла прэс‑цэнтру Хартыі’97 Таццяна Севярынец, у канцы сакавіка яна збіралася з’ехаць на некалькі дзён у Варшаву для ўдзелу ў семінары «Дзеці ў сістэме адукацыі», арганізаваным Варшаўскім цэнтрам школьнай працы. Жанчына напісала заяву з просьбай адпусціць яе ў водпуск за свой рахунак па сямейных акалічнасцях на перыяд з 26 па 31 сакавіка. Дырэктар школы падпісаў заяву, аднак, паводле правіл, яе таксама павінен ухваліць старшыня раённага аддзела адукацыі Уладзімір Шлома. Службоўца ж цягам некалькіх дзён не прымаў рашэння. Калі ж Таццяна Севярынец патэлефанавала яму, ён сказаў, што падпіша заяву, і яна можа сыходзіць у адпачынак. Аднак, нягледзячы на запэўненні, 23 сакавіка высветлілася, што заява Севярынец так і не была падпісаная старшынёй аддзела адукацыі.
У пятніцу, апошні працоўны дзень тыдня, Таццяна Севярынец неаднаразова тэлефанавала Шлому, але ён не браў слухаўку. Калі ж яна прыйшла ў аддзел адукацыі, службоўца адмовіўся яе прыняць. Не маючы іншага выйсця, Таццяна Савярынец звярнулася ў гарадскі аддзел адукацыі, дзе ёй паведамілі, што яе заява павінна быць задаволеная, і яна можа спакойна сыходзіць у адпачынак.
25 сакавіка Таццяна Севярынец з’ехала ў Менск, а адтуль адразу ў Варшаву. Калі яна вярнулася, высветлілася, што ўсе яе ўрокі знятыя з раскладу, а яе саму разам з дырэктарам школы выклікаюць да старшыні раённага аддзела адукацыі. Падчас сустрэчы Шлома заявіў, што яму «тэлефанавалі з КДБ і сказалі, што Таццяна Севярынец» была насамрэч у Менску і Варшаве, і ніякіх сямейных акалічнасцяў у яе няма». Дарэчы, з нагоды сямейных акалічнасцяў, — Таццяна Севярынец не толькі ўдзельнічала ў педагагічным семінары, але таксама наведала ў Варшаве магілу свайго дзеда, праваслаўнага святара. Тым не менш, жанчыну прымусілі напісаць тлумачальную.
Сёння дырэктар школы паведаміў, што Уладзімір Шлома даў загад аддзелу кадраў Першамайскага раённага аддзела адукацыі Віцебска рыхтаваць дакументы на звальненне Таццяны Севярынец.
Каментары