Мясніковіч — прэм'еру Кыргызстана: Нашы дзверы адкрытыя
«Калі ў вас будуць пажаданні — нашы дзверы адкрытыя, мы гатовыя абмяркоўваць з вамі пытанні супрацоўніцтва», — заявіў кіраўнік беларускага ўрада Міхаіл Мясніковіч прэм’ер-міністру Кыргызстана Жантора Сатыбалдыеву 28 верасня ў Ялце падчас двухбаковай сустрэчы.
Як паведамляе прэс-служба ўрада Беларусі, прэм’еры дзвюх краін абмеркавалі перспектывы развіцця гандлёва-эканамічнага супрацоўніцтва і магчымасці рэалізацыі новых сумесных праектаў.
Мясніковіч адзначыў, што Беларусь зацікаўлена ў партнёрстве з Кыргызстанам і выкананні запланаваных праектаў.
У сваю чаргу прэм’ер-міністр Кыргызстана заявіў, што ў якасці прыярытэтных для дзвюх краін выступаюць праекты ў машынабудаванні. Кыргызстан зацікаўлены ў выкананні дасягнутых раней з Беларуссю дамоўленасцяў і рэалізацыі сумесных праектаў.
Нагадаем, 24 жніўня ўлады Кыргызстана адклікалі з Мінска свайго пасла пасля неаднаразовых беспаспяховых зваротаў да беларускіх улад з патрабаваннем выдаць абвешчаных у міжнародны вышук сваякоў і набліжаных былога прэзідэнта Кыргызстана Курманбека Бакіева.
Спікер парламента Кыргызстана Астлбек Жээнбекаў 27 верасня з трыбуны 67-й сесіі Генасамблеі ААН заклікаў улады Беларусі выдаць абвешчаных у вышук сваякоў былога прэзідэнта Курманбека Бакіева.
«Мы ўсё яшчэ спадзяёмся, што ўлады Беларусі, якая з’яўляецца саюзнікам Кыргызстана ў межах АДКБ і ЕўрАзЭС і ўзяла на сябе абавязацельствы ў межах палажэнняў Мінскай і Кішынёўскай канвенцый, выкажуць сваю прыхільнасць міжнародна-прававым абавязацельствам і выдадуць сваякоў і набліжаных былога прэзідэнта Кыргызстана Курманбека Бакіева, якія хаваюцца на яе тэрыторыі і нават маюць беларускія пашпарты», — заявіў Жээнбекаў.
Каментары