На Полаччыне зьявілася чарговая новая газэта — «ART Проспект».
Пакуль што яна выходзіць накладам 299 асобнікаў, але яе заснавальнік, наваполацкі бізнэсовец, уладальнік клюбу «Night City» Артур Асновін плянуе зарэгістраваць у Міндруку сваё выданьне і ўключыцца на мясцовым інфармацыйным рынку ў барацьбу за чытача. Раней гэты пэрыёдык выходзіў дадаткам да газэты «Информ-плюс». Пасьля таго як «И+», самую масавую газэту Полаччыны (8 тыс. асобнікаў), набыў бізнэсовец Ўладзімер Захараў, стала зразумела, што «ART-у» давядзецца мяняць «месца дысьлякацыі», бо абодва гэтыя прадпрымальнікі маюць свае ўласныя інтарэсы ў гандлёвым бізнэсе. Рэдактар «ART Проспекта» Сяргей Балай паведаміў, што канцэпцыя выданьня будзе ранейшая: жыцьцё клюбу «Night City», расповеды пра эстрадных выканаўцаў, культурныя падзеі рэгіёну, навінкі відэа-, аўдыё- і кампутарных гульняў. Рэдакцыя газэты пакуль знаходзіцца ў стадыі фармаваньня калектыву, а асобнікі прадаюцца ў гандлёвых кропках сп.Асновіна.
У рэгіёне выходзяць таксама свая спартовая газэта «Overтайм» і яшчэ каля дзесяці інфармацыйных ды рэклямных газэт, працуюць два рэтрансьляцыйныя тэлеканалы «Квант» і «Скіф» ды адзін кабэльны — «Вэктар», FM-станцыя «Эўропа-плюс Полацак». Толькі дзьве мясцовыя газэты, «Полацкі веснік» і «Новая газета», зьяўляюцца выканкамаўскімі. Зь незалежных пэрыёдыкаў самы аўтарытэтны — газэта «Химик». Больш за 90% СМІ Полаччыны фінансуюцца зь мясцовых крыніцаў. Усё часьцей полацкі бізнэс укладае свае грошы ў сродкі масавай інфармацыі.
Тамаш Гурба, Полацак
Цяпер чытаюць
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку2424
Каментары