Zasnavalnik adnaho z najbujniejšych pryvatnych biznesaŭ Biełarusi Alaksiej Žukaŭ pradaje 75%-ju dolu ŭ «Alutech» adnamu sa svaich hałoŭnych kankurentaŭ — niamieckaj kampanii Hoermann.
Jak vyśvietliŭ «Ježiednievnik», infarmacyja ab pryznačanym ŭvachodžańni najbujniejšaha ŭ Jeŭropie vytvorcy haražnych i pramysłovych varot i pierahruzačnaj techniki ŭ kapitał «Alutech» była raźmieščana na sajcie Fiederalnaha ŭpraŭleńnia pa pytańniach kankurencyi (Bundeswettbewerbsbehoerde) jašče ŭ siaredzinie lipienia. Na razhlad hetaha viedamstva, u pryvatnaści, była vyniesiena ździełka pa nabyćci hrupaj kampanij Hoermann 75% doli ŭ zarehistravanaj na Kipry kampanii Elutek Investments.
Elutek Investments naležać aktyvy Hrupy kampanij «Alutech», a Alaksiej Žukaŭ źjaŭlajecca adnym z uładalnikaŭ Elutek Investments. Heta vynikaje z dakumientaŭ, abnarodavanych u vieraśni hetaha hoda Antymanapolnym kamitetam Ukrainy (AMKU). Sprava ŭ tym, što dla zakryćcia ździełki nieabchodna adabreńnie rehulataraŭ, na terytoryi jakich znachodzicca biznes «Alutech». U Kijevie hrupie kampanij «Alutech» z 2004 hoda naležyć fabryka pa vypusku siekcyjnych varot «Alutech-K».
U samoj kampanii «Alutech» na zapyt «Ježiednievnika» spačatku zajavili, što «my čutki nie kamientujem». Nijakaha kamientara nie dačakalisia žurnalisty i paśla nakiravańnia infarmacyi pra pahadnieńnie z archivaŭ Bundeswettbewerbsbehoerde i AMKU. Tamu padrabiaznaściaŭ uhody pa sumach, umovach i inšym pakul niama.
HK «Alutech», jakuju ŭ 1996 hodzie stvaryŭ avijacyjny inžynier Alaksiej Žukaŭ, da 2016 hoda ličyłasia adnym z samych paśpiachovych pryvatnych biznesaŭ Biełarusi.
Chołdynh, u skład jakoha ŭvachodziać try vytvorčyja pradpryjemstvy ŭ Biełarusi i pa adnym zavodzie ŭ Rasii i Ukrainie, asvoiŭ vypusk sučasnych raletnych sistem i siekcyjnych varot i staŭ adnym ź lidaraŭ na rynku SND. Z pačatku 2010-ch hadoŭ kampanija adpraviłasia zavajoŭvać Jeŭropu, adkryŭšy spačatku łahistyčny skład i dystrybucyjny biznes u Čechii, a ŭ 2013 hodzie kupiŭšy adnaho ź lidaraŭ rynku ES — kampanii Guenther-Tore Systems.
Adnačasova była pačata šmatmiljonnaja (bolš za 90 młn jeŭra) prahrama pa madernizacyi i pašyreńni mahutnaściaŭ, pad realizacyju jakoj Alaksiejem Žukavym byli pryciahnutyja resursy Mižnarodnaj finansavaj karparacyi (u 2010 hodzie — 22 młn jeŭra i ŭ 2012 hodzie — 25 młn jeŭra) i «Pryjorbanka» (20 młn jeŭra). Akramia taho, kampanija pryciahvała resursy JEABR. U 2013 hodzie Alaksiej Žukaŭ byŭ asabista uznaharodžany prezidentam Alaksandram Łukašenkam ordenam Ajčyny III stupieni.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ150
Kamientary