Biełaruski vytvorca trykatažnaha adzieńnia Mark Formelle pravioŭ rebrendynh. Kampanija pradstaviła abnoŭleny łahatyp i novuju vizualnuju kancepcyju, u asnovie jakoj — šmatsłojnaść, ekśpierymienty z vobrazami i svaboda samavyjaŭleńnia, piša Office Life.

U łahatypie zachavaŭsia zvykły kvadrat, ale šryft zrabili bolš sučasnym i futurystyčnym. Jaho płanujuć vykarystoŭvać u ličbavych prastorach i pry afarmleńni firmovych handlovych punktaŭ.
Akramia taho, kampanija stvaryła ŭłasnaha maskota pa imieni Mafik. U budučyni jon razam ź firmovaj typahrafikaj budzie źjaŭlacca na pryntach adzieńnia.
Novaja kancepcyja atrymała nazvu Multiply Fashion. Jana praduhledžvaje spałučeńnie roznych pradmietaŭ harderoba, faktur, koleraŭ i siłuetaŭ, kab ludzi mahli ekśpierymientavać z ułasnym stylem i stvarać indyvidualnyja vobrazy.

U asnovu novaj hrafiki brenda pakłali estetyku ryzahrafii — technałohii druku, pry jakoj vyjava farmujecca šlacham paśladoŭnaha nakładańnia kalarovych słajoŭ.
Źmieny zakranuli i firmovy koler kampanii — madžentu. Jaho zachavali, ale pierahledzieli adcieńni i sposaby vykarystańnia. U novaj palitry źjavilisia bolš śvietłyja i miakkija varyjanty hetaha koleru. U kampanii ličać, što heta dazvolić lepš spałučać jaho ź inšymi kalarovymi akcentami, zachavaŭšy suviaź z raniejšym stylem brenda.

Rebrendynh zakranie i firmovyja kramy. Ich afarmleńnie pierahledziać z ulikam novaj hrafiki: źmieny adbuducca ŭ vitrynach, navihacyi i elemientach interjera.
Taksama kampanija źmienić padychod da fotazdymkaŭ. Vyjavy stanuć bolš łakaničnymi, a madeli i adzieńnie buduć vyraźniej vyłučacca na fonie hrafičnych elemientaŭ.
Brend Mark Formelle byŭ zasnavany ŭ 2009 hodzie. Ciapier jon abjadnoŭvaje ŭłasnuju vytvorčaść i roźničny handal. Kampanija maje 24 fabryki i kala 330 firmovych kram u čatyroch krainach: Biełarusi, Rasii, Kazachstanie i Uźbiekistanie. Akramia taho, jana supracoŭničaje z bujnymi internet-markietpłejsami.
Pavodle źviestak Nacyjanalnaha centra intelektualnaj ułasnaści, pravy na zarehistravanyja ŭ Biełarusi tavarnyja znaki Mark Formelle naležać Śviatłanie Siparavaj, adnoj z suzasnavalnic kampanii.
U 2022 hodzie tavarny znak Mark Formelle byŭ pryznany ŭ Biełarusi ahulnaviadomym dla 25‑ha kłasa tavaraŭ. Da jaho naležać, u pryvatnaści, futbołki, majki, nižniaja bializna, kałhotki, kupalniki i škarpetki.
Mark Formelle vypuściŭ kalekcyju adzieńnia z pryntami kanalizacyjnych lukaŭ
Mark Formelle upieršyniu vypuściŭ kalekcyju plus size. Što pa cenach
Natoŭp školnikaŭ sabraŭsia pad kramaj Mark Formelle — brend vypuściŭ limitavanuju kalekcyju z šalona papularnym śpievakom z Baranavičaŭ
Mark Formelle vypuściŭ kalekcyju z kultavymi budynkami Biełarusi
Kamientary