Novaja GTA 6 ledź nie paralizavała śviet: užo paśla relizu ŭ Novaj Ziełandyi miljony pa ŭsioj płaniecie hladzieli tranślacyi z hulnioj. Doŭhačakanuju hulniu aficyjna nie pradajuć u Biełarusi, ale jość abchodnyja varyjanty.

Hulniu GTA 6, novy reliz u sieryi Grand Theft Auto, čakali 13 hadoŭ. Minułyja hulni ŭžo zrabili jaje kultavaj: z 1997 hoda było pradadziena bolš za 470 miljonaŭ kopij roznych hulniaŭ z toj sieryi.
Jašče da relizu GTA 6 ździŭlała ličbami vakoł jaje. Pieršy ž trejler hulni sabraŭ za sutki 90 miljonaŭ prahladaŭ na Youtube, što źjaŭlajecca rekordam dla hulniavoha trejlera. U historyi PlayStation Store ni adnu inšuju hulniu nie zamaŭlali tak šmat, a ŭsie videa pra GTA 6 na Youtube sabrali da relizu bolš za 40 miljardaŭ prahladaŭ.
Student Urocłaŭskaha ŭniviersiteta, biełarus, navat sabraŭ 1555 podpisaŭ pad pietycyjaj z prośbaj admianić zaniatki ŭ dzień relizu hulni — pradkazalna, što ničoha ŭ jaho nie atrymałasia.
Tym ža biełarusam, chto žyvie nie ŭ emihracyi, zhulać u GTA 6 moža być składana jašče i tamu, što Biełaruś nie ŭvachodzić u śpis krain, dzie aficyjna pradajuć hulniu. Pry hetym nie ŭsio tak drenna: niama paćviardžeńnia, što hulniu zabaroniena zapuskać u Biełarusi. Niama, adnak, i paćviardžeńnia, što GTA 6 abaviazkova zapracuje ź biełaruskaha IP-adrasa.
Što ž rabić? Usio zaležyć ad taho, jakaja ŭ vas hulniavaja kansol — pakul što možna zhulać u GTA 6 tolki na PlayStation 5, Xbox Series X ci Series S. Paźniej mohuć źjavicca viersii hulni dla noŭtbukaŭ, kampjutaraŭ i bolš starych madelaŭ PlayStation ci Xbox, ale pakul daty ich vychadu niama.
Jak hulać, kali ŭ vas Xbox Series X ci Series S
Aficyjnaj biełaruskaj kramy Xbox nie isnuje. Možna, viadoma, nabyvać hulniu ŭ kramach inšych krain — moža spracavać, naprykład, Turcyja ci ZŠA.
Hałoŭnaja prablema — jak apłacić, tamu što, jak pišuć na hiejmierskich forumach, biełaruskija karty ŭ kramach Xbox nie prachodziać. Tut jość niekalki varyjantaŭ. My raskažam pra samyja prostyja, ale ž jość i bolš składanyja schiemy: naprykład, adzin hiejmier nabyvaŭ hulni Xbox u tureckaj kramie servisu, kali sam znachodziŭsia ŭ Biełarusi i mieŭ profil, zarehistravany na Biełaruś. Dla hetaha jon vykarystoŭvaŭ turecki płaciežny servis.
Vy možacie nabyć GTA 6 u pasrednika, jaki časam hatovy navat stvaryć dla vas ulikovy zapis z naležnym rehijonam. Jość šmat varyjantaŭ. Naprykład, kali nabyvać viersiju hulni dla Indanezii, daviadziecca vydatkavać kala 270 rubloŭ, a kali dla ZŠA, to rychtujcie 299 rubloŭ. Viadoma, kali sistema pabačyć, što ŭ vas paznačany niesapraŭdny rehijon, heta moža vyklikać nastupstvy — naprykład, mohuć zabłakavać apłatu abo błakavać akaŭnt, chacia apošniaje i byvaje niačasta.
Inšy varyjant — nabyć hatovy kluč hulni i samastojna jaho aktyvavać. Kali vy ŭžo majecie ŭlikovy zapis u Xbox i hatovyja nabyć hulniu sami, možacie nabyvać u pasiarednikaŭ padarunkavyja karty, kab vykarystoŭvać ich dla apłaty ŭ Xbox. Ale ž dla padarunkavych kart važna paznačać krainu: naprykład, polskaja karta dapamoža papoŭnić bałans u polskaj kramie.
Viadoma, spracuje i dapamoha siabroŭ za miažoj. Samaje prostaje — znajomy nabyvaje aficyjny hulniavy kod i dasyłaje jaho vam, a vy jaho ŭvodzicie ŭ svajoj ulikoŭcy Microsoft. Možna i paprasić jaho nabyć padarunkavuju kartu, kod ź jakoj vy vykarystajecie, kab papoŭnić bałans u kramie toj ža krainy, dzie nabytaja karta.
A što kali ŭ vas PlayStation 5?
Najbolš zrazumieły varyjant — nabyć hulniu praz kartu papaŭnieńnia. Biełarusi niama ŭ śpisie rehijonaŭ PlayStation, tamu daviadziecca stvaryć ulikovy zapis na inšuju krainu, naprykład, na Polšču. Viadoma, heta razychodzicca z patrabavańniami Sony.
Kali akaŭnt hatovy, možna nabyć u biełaruskich pasrednikaŭ kartu — ale hladzicie, kab karta była vydadzienaja dla taho rehijona, na jaki ŭ vas zarehistravany ŭlikovy zapis. Pamianiać krainu paśla rehistracyi akaŭnta nielha. Niekatoryja pasredniki prapanujuć prosta dostup da hulni praz užo hatovy akaŭnt, a niekatoryja pradajuć kod aktyvacyi hulni.
Byvałyja hiejmiery, adnak, dajuć rady i biez pasrednikaŭ. Na adnym z forumaŭ jość post čałavieka, jaki apłaciŭ padpisku PlayStation Plus na polskim akaŭncie kartaj Visa ad biełaruskaha BSB banka. Rabiŭ jon heta praz braŭzier telefona z uklučanym polskim VPN.
I znoŭ ža, mohuć dapamahčy siabry za miažoj. Ale važna, jakoje vydańnie hulni jany nabuduć: kod z brytanskaha vydańnia, naprykład, nie spracuje ŭ vypadku z polskim akaŭntam.
U apošnija tydni źjavilisia paviedamleńni, što ŭ zamiežnych rehijonach PS Store, naprykład u Indyi ci Turcyi, pačała prachodzić apłata z kartak SND, u tym liku i ź biełaruskich. Nieviadoma, jakich kankretna bankaŭ heta datyčyć, i, mahčyma, heta nienadoŭha, ale varta pasprabavać i apłacić biełaruskaj kartkaj.
Što ŭ vyniku?
Samy nadziejny varyjant — znajomy za miažoj, jaki nabudzie hulniavy kod ci kod dla papaŭnieńnia ŭlikovaha zapisu i dašle vam. Kali kod padychodzić pad rehijon vašaha akaŭnta, ryzyka nievialikaja.
Možna nabyvać hulniu ŭ pasrednikaŭ, ale pytańnie ŭ tym, nakolki hety servis varty davieru. Na Kufar, naprykład, užo ciapier jość šmat prapanovaŭ.
Pierad tym, jak apłačvać, spytajcie ŭ pasrednika, što dakładna vy atrymajecie. Kali pasrednik abiacaje aformić hulniu na vaš akaŭnt, spytajcie, ci spatrebicca jamu ŭvachod u profil i ci viernie jon hrošy, kali niešta pojdzie nie tak. Kali vam prapanujuć hatovy akaŭnt z hulnioj, pasrednik u luby momant moža zakryć dostup, navat kali vy ŭžo spampavali hulniu. Tamu lepš za ŭsio, kali vam pieradaduć hulniavy kod, ź jakim vy sami aktyvujecie hulniu.
Možna, viadoma, šukać i inšyja mahčymaści — naprykład, pahulać z VPN i pašukać płaciežnyja siervisy, praź jakija tearetyčna moža prajści apłata biełaruskaj kartaj. Ale ž heta łatareja, i takija schiemy nie mohuć być univiersalnymi.
Narešcie, kali ŭ vas raptam akazałasia kartka, vydadzienaja ŭ toj ža krainie, da jakoj naležyć rehijon vašaha ŭlikovaha zapisu, vy zmožacie apłacić hulniu samastojna. Ale ž śpiecyjalna afarmlać takuju kartku dla hulni było b zanadta składana, i pasredniki — bolš chutki varyjant.
«Naša Niva» — bastyjon biełaruščyny
PADTRYMAĆ
Kamientary