Abmiežavańnie budzie dziejničać z 6:00 da 21:00.
U Minsku z 1 studzienia 2027 hoda płanujuć abmiežavać ruch pa Minskaj kalcavoj aŭtamabilnaj darozie dla hruzavikoŭ, traktaroŭ i samachodnych mašyn z 6:00 da 21:00. Pra heta na pasiadžeńni kamisii pa zabieśpiačeńni biaśpieki darožnaha ruchu pry Minharvykankamie paviedamiŭ namieśnik načalnika DAI Minharvykankama Dzianis Livanovič, piša BiełTA.

«Pa vynikach pasiadžeńnia kamisii pryniata rašeńnie ab poŭnym abmiežavańni ruchu pa Minskaj kalcavoj aŭtamabilnaj darozie z 6:00 da 21:00 dla hruzavikoŭ z technična dapuščalnaj ahulnaj masaj bolš za 3,5 t, a taksama traktaroŭ, samachodnych mašyn, śpiectechniki i inšaj techniki, pryraŭnavanaj da ich u adpaviednaści z Praviłami darožnaha ruchu», — skazaŭ Dzianis Livanovič.
Jon udakładniŭ, što na ŭzdymach, ujezdach, raźviazkach i inšych učastkach, dzie moža źjavicca taki transpart, ustalujuć adpaviednyja darožnyja znaki z ukazańniem časavych intervałaŭ.
«Kantrol budzie ažyćciaŭlacca jak u ručnym režymie supracoŭnikami Dziaržaŭtainśpiekcyi, tak i ŭ aŭtamatyzavanym — z vykarystańniem srodkaŭ fotafiksacyi, sistemy videanazirańnia i respublikanskaj sistemy manitorynhu hramadskaj biaśpieki», — dadaŭ namieśnik načalnika UDAI.
Dzianis Livanovič nahadaŭ, što padčas piłotnaha prajekta na asobnych učastkach MKAD užo ŭvodzilisia abmiežavańni na ruch hruzavikoŭ pa druhoj i treciaj pałosach źniešniaha kalca, a taksama zabarona na prajezd traktaroŭ i samachodnych mašyn.
Kiroŭcy takoha transpartu zmohuć albo płanavać pajezdki na dazvoleny čas, albo abjazdžać kalcavuju darohu pa inšych mahistralnych vulicach Minska i aŭtamabilnych darohach Minskaj vobłaści.
Akramia taho, dla zručnaści pieravozčykaŭ budujecca daroha z pramysłovaj zony Kaladzičy na MKAD-2. Taksama praduhledžana praciahnuć vulicu Śvisłackuju da vulicy Sielickaha.
Udzielniki pasiadžeńnia taksama abmierkavali abmiežavańnie parkoŭki hruzavoha transpartu masaj zvyš 2 t na vulična-darožnaj sietcy stalicy pa-za śpiecyjalna adviedzienymi miescami.
Dla hetaha płanujuć ustalavać adpaviednyja znaki, a raźmiaščać hruzaviki prapanujecca na isnujučych haradskich parkoŭkach.
Kamientary