Infapunkty dla biełarusaŭ za miažoj stvorać u Vilni, Varšavie i Poznani. Kolki ŭ ich budzie supracoŭnikaŭ i chto stanie płacić zarobki?
Tam padkažuć, kudy źviartacca z pytańniami pracaŭładkavańnia, lehalizacyi, miedycyny i adukacyi.

Pradstaŭnictva Abjadnanaha pierachodnaha kabinieta pa sacyjalnaj palitycy płanuje da siaredziny śniežnia adkryć biaspłatnyja infarmacyjnyja punkty dla biełarusaŭ u Vilni, Varšavie i Poznani. Tam padkažuć, kudy źviartacca z pytańniami pracaŭładkavańnia, lehalizacyi, miedycyny i adukacyi. «Biełsat» pacikaviŭsia, navošta patrebnyja fizičnyja punkty, kali dapamohu možna atrymać anłajn, a taksama daviedaŭsia, ci jość na heta finansavańnie.
«Spačatku buduć vałanciory»
Afłajn-punkty raźličanyja na ludziej, jakim ciažka samastojna znajści dapamohu ŭ internecie — siarod ich byłyja palitviaźni i ludzi piensijnaha vieku.
«U punkcie im padkažuć, jakaja arhanizacyja moža dapamahčy ź ichnaj prablemaj, i pry nieabchodnaści daduć pamiatku ź infarmacyjaj», — raskazała «Biełsatu» Vieranika Stankievič, pradstaŭnica pa sacyjalnaj palitycy APK.
U kožnym punkcie budzie pracavać pa adnym čałavieku. Spačatku heta buduć vałanciory. Ciapier kamanda šukaje finansavańnie, kab apłačvać ichnuju pracu. U testavym režymie punkty płanujuć adkryvać dva-try razy na tydzień u budnyja dni, bližej da viečara, kab tudy možna było pryjści paśla pracy.
«Pierad zapuskam kamanda pravodzić apytańnie, kab daviedacca, ci patrebnyja takija punkty i ŭ jaki čas ludziam było b zručna prychodzić. Damoŭlenaści nakont niekalkich pamiaškańniaŭ užo jość, ale śpis haradoŭ jašče moža źmianicca. Naprykład, kali apytańnie pakaža, što ŭ Poznani taki punkt nie patrebny, jaho mohuć adkryć u inšym horadzie», — kaža jana.
U infapunktach źbiaruć infarmacyju pra biełaruskija arhanizacyi, jakija dapamahajuć ź lehalizacyjaj, pracaŭładkavańniem, adukacyjaj ci humanitarnymi pytańniami. Kansultanty padkažuć, kudy źviarnucca ŭ kankretnaj situacyi, daduć patrebnyja spasyłki i pry nieabchodnaści dapamohuć padać zajaŭku anłajn. U pradstaŭnictvie raźličvajuć, što tak ludzi buduć radziej źviartacca, naprykład, pa finansavuju dapamohu ŭ arhanizacyi, jakija zajmajucca lehalizacyjaj.
Dyjaspary patrebnyja miescy, kudy možna pryjści z pytańniami
Pavodle surazmoŭcy «Biełsatu», patrebu ŭ asabistych kansultacyjach zaŭvažyli padčas pracy z byłymi palitviaźniami. U niekatorych ź ich niama kampjutara, tamu navat zapoŭnić ankietu na atrymańnie dapamohi byvaje składana. Raniej dla hetaha sustrakalisia ŭ tym liku ŭ kaviarniach.
«U nas jość kiejsy, jašče kali ja pracavała ŭ «Volnych», jak da čałavieka jedzie praz uvieś horad vałancior, kab dapamahčy, kab adkryć kampjutar i niešta zrabić», — raskazała jana.
Jak prykład pracy ŭ punkcie Stankievič pryvodzić dapamohu ŭ zamovie praduktovaha naboru, jaki atrymlivajuć byłyja palitviaźni paśla vychadu na volu. Pra toje, nakolki zapatrabavanyja punkty, kamanda budzie mierkavać pa kolkaści zvarotaŭ paśla testavaha zapusku.
Praz šeść hadoŭ emihracyi patreba ŭ asabistych kansultacyjach stała bolšaj, čym u pieršy hod, miarkuje Stankievič. Za hety čas u krainach, dzie płanujuć adkryć infapunkty, paboleła biełarusaŭ, i, na jaje dumku, dyjaspary patrebnyja pastajannyja miescy, kudy možna pryjści z pytańniami.
«Biełarusaŭ šmat, prablem šmat, i treba, kab niechta adkazvaŭ na hetyja pytańni», — skazała jana.
Kamientary