Pravakacyja ź vialikaj kolkaściu achviar i abvinavačvańniem Ukrainy. Stała viadoma, jakuju pravakacyju rychtavali na polska-rasijskaj miažy
Rasijskija śpiecsłužby płanavali apieracyju ź vialikaj kolkaściu achviar, piša Rzeczpospolita.

Rasijskuju apieracyju rychtavali na kaniec kastryčnika — pačatak listapada, paviedamlaje Rzeczpospolita. Hazieta spasyłajecca na vysokapastaŭlenych surazmoŭcaŭ, źviazanych ź siłavymi strukturami i znajomych z padrabiaznaściami polskaj previentyŭnaj apieracyi.
Pavodle ich, płan praduhledžvaŭ dyviersiju na polskaj terytoryi pablizu miažy, mahčymaje pierasiačeńnie miažy i insceniravany napad na abjekt u samoj Rasii. Adkaznaść za heta chacieli ŭskłaści na Ukrainu.
«U nas była infarmacyja pra kankretnyja abjekty, dzie musiŭ adbycca napad. Rasijanie raźličvali na vialikuju kolkaść achviar», — skazaŭ adzin z surazmoŭcaŭ.
Jakija mienavita abjekty mahli stać celami, jon nie raskryŭ.
Inšaja krynica paraŭnała zadumu z Hlivickaj pravakacyjaj 1939 hoda, kali nacysty insceniravali napad na niamieckuju radyjostancyju, kab abvinavacić u im Polšču.
«Heta musiła nahadvać niešta kštałtu Hlivickaj pravakacyi. Viadoma, tych, chto pierasiok by miažu, najchutčej zastrelili b abo znajšli b pry ich dokazy taho, što jany z Ukrainy. Metaj było spynieńnie dapamohi Ukrainie», — patłumačyŭ surazmoŭca haziety.
Chto musiŭ vykanać apieracyju, dakładna nieviadoma. Vydańnie piša, što heta mahli być, naprykład, hramadzianie Ukrainy, jakija žyvuć u Polščy, abo ludzi, pryviezienyja ź inšaj krainy.
Papiaredžańnie pra pahrozu pastupiła ad partniorskich śpiecsłužbaŭ. Na mahčymaść pravakacyi ŭkazvali i polskija analityki. Jašče adnym tryvožnym sihnałam, pavodle krynic haziety, stała źjaŭleńnie z rasijskaha boku aficeraŭ śpiecsłužbaŭ, jakija kaardynujuć dyviersijnyja dziejańni.
U adkaz Polšča ŭzmacniła achovu miažy. U pamiežnyja rajony nakiravali palicejskich ź inšych rehijonaŭ i dadatkovych supracoŭnikaŭ Ahienctva ŭnutranaj biaśpieki. Uzmacnili padraździaleńni pamiežnaj achovy.
U Varminska-Mazurskim vajavodstvie arhanizavali vučeńni śpiecvojskaŭ. Tudy taksama nakiravali elitnyja bajavyja hrupy śpiecpadraździaleńniaŭ GROM, NIL i AGAT, u tym liku ź bieśpiłotnikami.
«Metaj było strymlivańnie, ale taksama patencyjnyja dziejańni na apiaredžańnie», — skazaŭ čałaviek, znajomy z padrabiaznaściami apieracyi.
Kaardynatar polskich śpiecsłužbaŭ Tomaš Siamoniak paćvierdziŭ, što pahrozu acanili jak realnuju, a na miažy dziejničali pamiežniki, palicyja i vojska.
«Kali my zrabili peŭnyja kroki, to tamu, što paličyli: isnuje realnaja pahroza», — zajaviŭ jon.
Adnak publična paćviardžać kankretny scenar napadu ź vialikaj kolkaściu achviar ministr nie staŭ.
«Navat kali ŭ nas jość takaja infarmacyja, my joju nie dzielimsia. My možam rabić heta ŭ vypadku faktaŭ, kali niešta adbyłosia abo było praduchilena. Astatniaje — peŭnaja forma śpiekulacyi», — skazaŭ Siamoniak.
Pavodle źviestak Rzeczpospolita, padobnyja papiaredžańni atrymali taksama śpiecsłužby Litvy, Łatvii i Estonii.
Kamientary